Edukira zuzenean joan

Chagall. Urte erabakigarriak, 1911−1919

TAG_Tirudiak_VALUE
Izenburua:
Chagall. Urte erabakigarriak, 1911−1919
Data:
2018ko ekainak 1 - 2018ko irailak 2
Komisariotza:
Lucía Agirre
Erakusketa mota:
Banakakoa
Gaiak:
Ibilbide artistikoa | Lehen Mundu Gerra | Marc Chagall
Mugimendu artistikoak:
Abangoardia

Batez ere arimaren egoera bat iruditzen zait artea. —Marc Chagall, Eygens (Nire bizitza) 

Marc Chagallen obran murgiltzen garenean, topatzen dugun unibertsoa bakuna da itxuraz; ordea, errealitate konplexu bat hartzen du barnean, artistak sofistikazioz elkarlotzen baititu lehen begiratuan antagonikoak eman dezaketen munduak, 1911z geroztik osagarri bilakatu zirenak beretzat. 

1887an jaio zen Chagall, familia judutar hasidiko batean (judaismoaren adar bat), garai hartan tsarren Errusiaren baitan zegoen Vitebskeko hiri txikian. Ingurune mugatuan hazi zen: komunitateak jartzen zituen Errusiako artean eta kulturan murgiltzeko mugak, baina baita garaiko politikek ere, judutarrak ghettoetan marjinatzen baitzituzten eta eskubideak kentzen baitzizkieten. Hala ere, Marc Chagall gazteak goiz egin zion aurre horri guztiari: Errusiako eskolan ikasten hasi zen; gero, arte-ikasketak egin zituen Yuri Penekin, Vitebsken; eta, ondoren, San Petersburgora joan zen bizitzera, judutarrek baimen berezi batekin soilik egin zezaketena. Hala ere, 1911n gertatu zen haustura erabakigarria Marc Chagallentzat, Léon Basktek bultzatuta Parisera joan eta bertan bizimodu berriari ekin zionean. 1914ko maiatzera arte, Parisen egin zuen lan Chagallek; bertan sortutako obra multzoan, Vitebskeko komunitate hasidikoko bizimoduaren oroitzapenak eta metropoli modernoko ikonoak uztartu zituen. Horrela, Errusiako herri-artearen eta familia-kulturaren oroitzapenak Parisko abangoardiak eskaintzen zizkion esperimentu estilistiko aurreratuenekin nahasten ziren; besteak beste, Pablo Picassoren, Robert eta Sonia Delaunay-ren eta Jacques Lipchitz-en esperimentuekin. 

1914an, jaioterrira itzuli zen, arrebaren ezkontzara joateko eta bere emaztegai Bella Rosenfeld ikusteko, baina Lehen Mundu Gerrak han harrapatu, eta bertan geratu behar izan zuen, zortzi urtez. Hala, bere burua aurkitzeko fase batean murgildu zen artista, eta garai hartako pintura eta paper gaineko lan ugari dira horren erakusgarri. Halaber, autorretratuak, eguneroko bizitzaren irudiak —Bella emaztearen eta Ida alabaren ondoan—, gerrak eragindako sarraskiaren irudikapenak, bere komunitateko bizimoduaren eta Errusia berriaren marrazkiak egin zituen artistak. Iraultzaren ondoren, Vitebskeko Arte komisario izendatu zuten Chagall, eta kargu horrek ahalmena eman zion eskualdeko museoen eta arte-eskolak zuzentzeko, baita artearen inguruko ekitaldiak antolatzeko ere. 

Kunstmuseum Basel-ek antolatutako erakusketa, Guggenheim Bilbao Museoarekin lankidetzan