- Izenburua:
- Brancusi–Serra
- Data:
- 2011ko urriak 8 - 2012ko apirilak 15
- Erakusketa mota:
- Taldekoa
- Gaiak:
- Artea eta denbora | Artea eta espazioa | Sorkuntza artistikoa | Materiala
- Erakusketa birtuala:
- https://www.guggenheim-bilbao.eus/eu/erakusketak/brancusi-serra/
Erakusketa hau Fondation Beyeler-ekin lankidetzan antolatu zen eta Constantin Brancusi-ren eta Richard Serra-ren lanetan denboraren eta espazioaren kontzeptuek zer esanahi duten aztertu zuen. XX. mendeko eskultoreen adierazgarri bikain banaren hogeita hamar bat lan ikusgai jarri ziren: Brancusirenak gaika antolatu ziren eta hala haren artegintzaren funtsa agerian utzi zen; aldi berean, Richard Serraren eskulturekin alderatu eta bi artisten arteko lotura ezarri zen. Horrez gain, artistek aukeratutako materialek zer zirrara eragiten duten azpimarratu zen: Brancusik marmola, zura, zementua, igeltsua eta brontzea, besteak beste, erabili zituen; Serrak, berriz, altzairua, kautxua, beruna eta neoi-tutuak, besteren artean. Erakusketako zenbait gunetan bien lanak ondoz ondoan zeuden, besteetan, aldiz, txoko berezia zuten; hala aditzera eman zen bien arteko antzekotasunak eta aldeak eta agerian utzi zen eskulturak espazioa eraldatzeko ahalmena duela; bi egoitzen arkitekturak, gainera, eginkizun garrantzitsua izan zuen, beraz, hirugarren ahots bat zegoen eskulturen aukeraketarekin solasean.