Maria Helena Vieira da Silva. Espazioaren anatomia

Atalak

Maria Helena eta Arpad

1928an, Maria Helena Vieira da Silva Lisboatik Parisera joan zen arte-ikasketetan sakontzera. Académie de la Grande Chaumière ikastegian eman zuen izena, non muga akademikoetatik aske irakasten baitzituzten pintura eta eskultura, irakaskuntzari eta ikasketa-prozesuari buruzko ikuskera zabalarekin. Bertan, Arpad Szenes hungariar margolariarekin egin zuen topo. Bi artisten begiradak ikastegian gurutzatu baziren ere, handik bi urtera ezagutu zuten benetan elkar, eta laster ezkondu ziren. Bikoteak harreman zoriontsua izan zuen, eta elkarrekin izan ziren biak 1985ean Szenes hil zen arte. Vieira da Silvak pinturarekiko zuen debozio erabatekoa biziki errespetatzen zuen Szenesek, eta gorazarre ere egiten zion grina hari, emaztea lanean irudikatzen zuten erretratu ugari margotuta. Horietako bat da hemen ikusgai dagoen Maria Helenaren erretratua (1940) obra. “Misterio hutsa da dena. Gure bizitza miragarria izan da. Mundu guztia dago harrituta! Elkar maite duten eta bizitza osoa elkarrekin eman duten bi margolari”: horrelaxe deskribatu zuen Vieira da Silvak beren arteko lotura.