Kandinsky
Kandinsky [Sarrera]
Eremu kosmikoak: Errusiatik Bauhausera
Atalak
Hastapenak: Munich
- Izenburua:
- Hastapenak: Munich
- Erakusketa:
- Kandinsky
- Gaiak:
- Artea eta emozioa | Artea. Teoria | Artearen historia | Eragin artistikoa | Ibilbide artistikoa | Forma | Kolorea | Lerroa | Paisaia | Der Blaue Reiter | Falange taldea | Municheko Artisten Elkarte Berria | Espiritualtasuna | Errusia | Mosku | Munich | Franz Marc | Gabriele Münter | Herri-kultura | Bidaiak
- Mugimendu artistikoak:
- Abangoardia | Arte Abstraktua | Arte Garaikidea | Neoinpresionismoa
- Artelan motak:
- Pintura
- Aipatutako artistak:
- Kandinsky, Vasily
Vasily Kandinskyren haurtzaroa bere jaioterrian, Moskun, eta Odessan (orduan Errusia; gaur egun, Ukraina) igaro zen, non bere familiak artearekiko eta musikarekiko zaletasuna piztu baitzion. Zuzenbidea eta Ekonomia ikasi zituen, baina 1895ean norabidea guztiz aldatu eta Moskuko Kushnerev arte grafikoen lantegiko arduradunetako bat bihurtu zen. Urtebete geroago, inpresionismo frantsesaren erakusketa bat eta Wagnerren opera bat ikusi izanak akuilatuta, Munichen bizitzea erabaki zuen, margolaritzan jarduteko. Errusiako oroitzapenak, hango nekazarien etxeetako altzarien apainketa alaiak eta deboziozko irudiak esaterako, bai eta historizismo erromantikoa, poesia lirikoa, folklorea eta fantasia dira Kandinskyren lehen lanen osagaiak.
Kandinsky eta bere neska-laguna, Gabriele Münter artista alemaniarra, bidaian ibili ziren Europan eta Afrika iparraldean barna 1904 eta 1907 artean, 1908an Munichera itzuli aurretik. Grabatuak berezkoak dituen konposizio-elementuak, nola diren argi-argi delineatutako formak eta perspektiba lautua, nagusitzen dira 1908 eta 1909 artean sortu zituen paisaia bavariar koloretsuetan. Margolan horiek oso bestelakoak dira egileak neoinpresionismoaren ildotik egin zituen aurreko ariketen aldean, non bere lanak kolore-ukitu txikien bidez eraikitzen baitzituen.
Munichen zegoen bitartean, hiriko abangoardia-talderik garrantzitsuenak gidatu zituen Kandinskyk, adibidez Falangea (Phalanx) izenekoa eta Municheko artisten elkarte berria (Neue Künstlervereinigung München), eta funtsezko hainbat tratatu argitaratu zituen, besteak beste Über das Geistige in der Kunst (Espirituzkoa artean). 1911n Kandinskyk eta Franz Marc-ek Zaldun Urdina (Der Blaue Reiter) sortu zuten, kolorearen adierazkortasun-ahalmenean eta formaren erresonantzia sinbolikoan —erresonantzia espirituala, askotan, haien ustez— interesatuak zeuden artisten elkarte heterogeneoa.
1913an, Kandinskyk lehenago erabili ohi zituen motiboak —zaldia eta zalduna, muino uhinduak, dorreak eta zuhaitzak— lerroaren eta kolorearen mendean jarri zituen. Ingerada kaligrafikoek eta forma erritmikoek beren jatorri figuratiboen gero eta arrasto gutxiago erakusten zuten heinean, abstrakzioan barneratzen eta “paletaren botere ezkutua” deituko zuena formulatzen hasi zen Kandinsky.