David Salle
Tennyson
E.A.J.A.
Iruzkinak
Pressed-in sturges
- Izenburua:
- Pressed-in sturges
- Erakusketa:
- David Salle
- Gaiak:
- Generoa eta sexualitatea | Artea eta umorea | Artearen historia | Eragin artistikoa | Sorkuntza artistikoa | Sinbologia | AEB | Preston Sturges | Dualtasuna
- Mugimendu artistikoak:
- Arte Figuratiboa
- Artelan motak:
- Pintura
- Aipatutako artistak:
- Salle, David
Lan honen izenburua, Pressed-in Sturges, Hollywoodeko Preston Sturges idazle eta zuzendari ezagunaren izena erabiliz osatutako hitz‑jokoa duzue. Autore honek arrakasta handiko zazpi komedia egin zituen 40ko hamarkadan zehar. Salle-ren lanean, komedia eta umore beltzeko osagaiak nahasten dira, malgutasunik gabeko irudiak erabili arren. Teknika jostagarri honen ageriko adibidea dugu honako koadroa. Ikus, beheko aldean eskuinetara, emakume baten irudia agertzen dela musika‑tresna bitxi bat laztanduz. F formako biolinaren zuloak emakume baten bagina sinbolizatzen duten ikusmen‑jokoak dira. Koadroaren goiko aldean agertzen den berde koloreko forma handiak, bestalde, emakume baten obarioen zilueta dirudi.
Aipatutakoez gain, beste zenbait osagai agertzen dira koadroan esekita, hala nola, estatuatxo txiki bat, eta urrezko kaliz bitxi bat, alboetara ateska artikulatu batzuk dituela.
Neurrigabeko irudi‑kakofonia hau ohikoa da Salleren helduaroko estiloan. Koadroaren goiko erdia edaria eta dibertsioa irudikatzen dituen ihauterietako eszena bat da, erdiko figura adardun barregarriak eteten duena. Eszena hau bera osorik errepikatzen da eskuinean. Pertsonaiek jantzita dituzten mozorroek Belgikako James Ensor pintorearen lana dakarkigute gogora, burgesia ustela eta aurki lehertzekoa zen Lehen Mundu Gerraren hondamendia margotu baitzituen, mozorro eta munstroez osatutako konposizio ederretan. Deabruzko begitarte honek Francisco de Goya pintore espainiarraren azken urteetako pintura beltzak dakarzkigu gogora halaber, sorgin, ahuntz eta astoez osatutako bere psikearen mundu iluna margotu baitzuen. Era berean, Salleren lana 80ko hamarkadako Estatu Batuetako arrakasta eta aberastasunaren distiran murgiltzen da, bere baitan ezkutatzen duen ilunpeko mundua agerian uzteko.