David Salle
Komedia (Comedy)
Iruzkinak
Zeruko erregea (Sky King)
- Izenburua:
- Zeruko erregea (Sky King)
- Erakusketa:
- David Salle
- Gaiak:
- Artearen historia | Eragin artistikoa | Sorkuntza artistikoa | Natura hila
- Mugimendu artistikoak:
- Arte Figuratiboa
- Artelan motak:
- Pintura
- Aipatutako artistak:
- Salle, David
Zeruko erregea erakusgai dauden lan guztien arteko berriena da, 1998koa hain zuzen ere. Koadro honen tonua eta irudiak leunagoak dira, 80ko hamarkadaren amaierako lan polemikoetakoak baino. Salle-k orduko konposizio bizi eta konplexu berberak erabiltzen jarraitzen badu ere, arte tradizionalaren erreferentziak eta eszena hutsalak uztartuz, desagertu egin dira jarrera lizunak eta ikusmen‑joko iraingarriak. Ezkerreko mihisearen gainean laino zuri bat oldartzen ari da, Sallek eszena hori pintura zuriz zikindutako kristal batean zehar margotu izan bailuen. Lehen planoan kokatutako bodegoiak areago iluntzen du gela, gela arrunt bezain zalantzazkoa, eta horrela, oztopatu egiten digu ikusgai dugunaren gaineko ulermena.
Bodegoia, bestalde, argia eta zehatza da. Fruta‑ontziak gure arreta erakartzen du, barrualde hutsaletik kanpo. Frutari inolako garrantzi errealik eman beharrean, Sallek bodegoien pinturaren tradizio osoa irudikatzeko erabiltzen du bodegoi hau. Bodegoi honen eginkizuna bodegoi guztiak irudikatzea baita. Paisaje bat txertatzea ez da batere ohikoa Salleren obran, baina, aurreko koadroa bezalaxe, honakoa eraketa artifiziala da, agerikoa baita bodegoia ez duela berezko eran irudikatu. Era berean, bereganatu egin du irudia, eskuineko euri‑tanta estilizatuak zein gitarrak Rene Magritte pintore belgikarra baitakarkigute gogora, izan ere, artista hark ere objektu flotatzaileak erabili baitzituen bere konposizio kriptikoetan.
Sallek bere koadroetan irudiak bateratu eta batzuk besteen gainean jartzeko darabilen era jostagarriak, askatasuna ematen dio aukeratzen duen edozein genero edo estilo elkartzeko. Arrunta edo gustu onekoa, errealista edo fantastikoa izan, haren pintura harrigarria eta erakargarria izan daiteke, abstrakzio hutsera edo narratibara jotzeko beharrik izan gabe. Sallek estilo intuitiboa eta aldakorra sortu du, era askotako iturrietatik aterea izan arren bere‑berea duena, eta erraz antzeman daitekeena, garai modernoko beste edozein pintoreren estiloa erraz antzematen den bezalaxe.