Garmendia, Maneros Zabala, Salaberria. Prozesua eta metodoa
Erlea Maneros Zabala
Atalak
Xabier Salaberria
- Izenburua:
- Xabier Salaberria
- Erakusketa:
- Garmendia, Maneros Zabala, Salaberria. Prozesua eta metodoa
- Gaiak:
- Artea eta historia | Artea. Teoria | Eragin artistikoa | Lan intelektuala | Sorkuntza artistikoa | Gogoeta
- Artelan motak:
- Arkitektura | Eskultura | Eskultura-objektua | Instalazioa
- Aipatutako artistak:
- Salaberria, Xabier
Xabier Salaberriaren (Donostia, 1969) artegintza bere belaunaldikoen guztiz bestelakoa da: artea, diseinuaren eta arkitekturaren arteko eremuan dabil. Ibilbide osoan, sarri ikertu du Modernotasunaren historia; ikerketa intelektualerako alor emankorra izan da harentzat. Salaberriak eskultura- eta arkitektura-izaerako instalazioetan txertatzen du gai hori. Maiz elkarlana eta parte-hartzea sustatzeko erlazio-estrategiez baliatzen da, eta, horrenbestez, publikoarekin eta bestelako arte-agenteekin elkartrukeak egiteko aukera ematen du. XXI. mendeko eskulturaren kontzeptuaren inguruko hausnarketak, modernotasunaren nozioa eta erlazio-artea honako artelan adierazgarrietan ikus daitezke: Fronte hotza (Cold Front, 2008/13), Egin gabeko proiektu baten II. zatia (Part II of An Unbuilt Project, 2007), Hondamendia (Debacle, 2009), Titulurik gabea (2011), Inkontziente/kontziente (2011–13), Martello (2012) eta A.T.M.O.T.W. (2013), besteak beste.
Azken lan hori, A.T.M.O.T.W., da erakusketarako berariaz egindakoa. 304. aretoan dago. Salaberriak artelan hori hausnarketarako bide gisa taxutu du: museoa artea eta bestelakoak erakusteko eta aditzera emateko lekua dela hausnartzen lagundu dezan diseinatu du. Izenburua, A.T.M.O.T.W., “All The Material Of The World” [Munduko material guztiak] esapidearen inizialak dira; artistaren asmoa —proiekzio entziklopedikoa— nabaria da izenburuaren aukeraketan, eta, Museoaren arkitekturak proiekzio horren azpitestu moduan jokatzen du. Askotariko erreferentziak ezkutatzen dira artelan horretan: batzuk ilunak dira, esaterako, “euskal eskultura” ideiarena; beste batzuk argiak, betoizko adreiluekin egindako hormak nabarmen gogorarazten baitu Rietveld pabilioia —Gerrit Thomas Rietveld arkitektoak eraiki zuen 1955ean Sonsbeek Park Nazioarteko Eskultura-Erakusketarako (Arnhem, Herbehereak)—. Modernotasunaren, industria-iraultzaren eta masa-ekoizpenaren bereizgarri den serializazioaren historia deseraikitzen du horien bereizgarri diren tresna-objektuen eta erakusketa-gailuen bidez.