Antoni Tàpies. Objektutik eskulturara (1964-2009)

Atalak

Paretak, hormak, ateak

1969an kaleratutako “Comunicación sobre el muro” artikuluan, bere obretako hormen anbibalentziari eta esanahi anitzei buruz idatzi zuen Tàpies-ek:

“Makina bat iradokizun sor daitezke horma baten iruditik eta horma horrek eskaintzen dituen aukera guztietatik! Banaketa, itxialdian egotea, doluen horma, espetxearen horma, denboraren iragaitearen lekukotasuna; azalera leunak, lasaiak, zuriak; azalera torturatuak, zaharrak, zaharkituak; giza arrastoen, objektuen, elementu naturalen aztarnak; borrokaren eta ahaleginaren sentipena; suntsipenarena, hondamendiarena; edo eraikitzearena, sortzearena, orekarena; maitasun, oinaze, higuin, anabasa hondarrak; hondakinen prestigio erromantikoa; elementu organikoen ekarpena (…) materia orokorra; lurreko gauzen adierazpena eta balioespena (...) erortzearen, hondoratzearen, zabaltzearen, kontzentratzearen sentipena; munduaren gaitzespena, barrura begiratzea, grinen deuseztatzea, isiltasuna, heriotza; urradurak eta torturak (…) soinuen, atzamarken, urratuen, leherketen, tiroen, kolpeen, mailu-hotsen, garrasien, oihartzunen, espazioko oihartzunen baliokidetasunak; gai kosmiko baten inguruko gogoeta, lurra, magma, laba, errautsa behatzeko hausnarketa; gudu-zelaia; lorategia; joko-eremua; iragankortasunaren helmuga (…). Eta nik hainbeste estimatzen ditudan filosofia eta jakituriei harrotasunez lotzen ninduten beste hainbat eta hainbat gauza ere bai!”.