Yayoi Kusama: 1945tik gaurdaino

Atalak

Infinitua

“Behin eta berriro errepikatzen nuen prozesua, eta sare haiek infiniturantz hedatzen hasiak ziren. Inguratu egiten ninduten, ahaztu egiten nintzen neure buruaz, besoei, hankei, arropari atxikitzen zitzaizkidan, eta gela osoa betetzen zuten”.

Kusama landare-mintegi batean hazi zen, loredi zabalez inguratua. Baina Infinitu-sareak izeneko margolan ezagunak egiterakoan ez zituen lore-soro haiek hartu inspirazio-iturritzat, itsaso zabala baizik: 1957an AEBra lehenengoz zihoala hegazkinetik ikusi zuen Ozeano Pazifikoa. Sail horretako mihiseak modu obsesiboan eta keinu azkarrez margotutako arku ñimiñoz beteta daude, halako eran non sarez eta elkarri lotutako puntuz osatutako patroi espresionista bat eratzen baitute. Pintzelkada askeek kontrastea egiten dute errepikakortasunarekin, eta azken horrek hierarkiarik gabeko unibertsoaren hasiera eta amaiera identifikatzea eragozten digu. Unibertso horren dimentsioak handituz joan dira Kusamaren lanetan, ikusleak bere instalazioen mugagabetasunean murgilarazi arte.