Yayoi Kusama: 1945tik gaurdaino

Atalak

Alderdi biokosmikoa

“Lurra tanto bat baino ez da kosmoseko milioika izarren artean. Tantoak infiniturako bide bat dira. Tantoen bidez natura eta gure gorputzak ezabatzen ditugunean, gure ingurunearen batasunaren parte bihurtzen gara”.

Familiaren landare-mintegitik gertu hazi zenez, bizitza organikoarekiko lotura handia sentitu izan du Kusamak txiki-txikitatik, eta harentzat, bizitza organiko hori erabat lotuta dago kosmosaren espazio eta dimentsioekin. “Alderdi biokosmikoa” delakoak zera adierazten du, Kusamarentzat gauza bat eta berbera dela mundutarra nahiz zerutarra den oro. Umetan, landareen anatomia, bizi-zikloak eta zeruaren eta lurraren arteko lotura behatzen hasi zen. Bere lanetan hainbestetan agertzen diren tanto horien esanahia lehen aldiz azaltzean, Kusamak zeruko argizagiekin konparatu zituen, eta sinbolo kosmiko gisa interpretatu. Alderdi biokosmikoari lotuta Kusamaren lanean gehien agertzen den irudia hain berea duen kalabazarena izango da segur aski; haien gainazal apetatsuki uhinduak eta pikardatuak landare-espiritu ongile batekin identifikatzen ditu Kusamak, baita bere arimarekin ere. Naturaren aurrean duen jarrerak argi erakusten ditu Kusamak munduarekiko duen alienazioa eta kosmosarekin bat egiteko duen behar hedakorra.