Atzera begira. Giorgio Morandi eta Antzinako Maisuak

Iruzkinak

Natura hila (Natura morta), 1930

1930eko natura hil honetan, ezkerraldean dagoen petrolio-kinkea erabateko berrikuntza da Morandi-k ordura arte margotutako konposizioen artean. Hemen ere aipa daiteke De Chirico italiar margolariak Morandiren gaztaroko lanei buruz esandakoa, hots, “objektu ohikoenen metafisika” direla.

Koadro honek oreka-sentipen nabarmena transmititzen du. Petrolio-kinkeak eta frutaontziak mihisea hiru zati ia berdinetan banatzen dute, eta distantzia bera dago horien artean eta horietatik ertzera. Harrigarria da Morandik sorrarazten duen bake- eta lasaitasun-sentipena. Objektuen gelditasunak denborarik gabeko jarraitutasuna iradokitzen du.

Argi arre batek estaltzen du koadroa, eta argi-iluna ezabatu eta tonalitateak arintzen ditu; hainbeste, ezen objektuek ez baitute itzalik. Baina kolore-sortaren alderdirik harrigarriena da nola lortzen duen Morandik tonu marroiak mailakatuz halako ñabardura ugariak ateratzea. Gainera, ukitu berdeak eta urdinak ere ikusten dira.

Morandiren koadroetan ezkutuko kolore-maila asko daude, gainjarritako geruzak aplikatzen baitzituen. Azaleko gris eta zurien atzean, gorri eta urdin distiratsuak daude; azken horiek distira beroagoak eta anitzagoak emateko balio dute, esaterako, Morandik marraztutako objektuen beiraren edo portzelanaren distira estaltzen duten hauts-geruzek dituztenak.

Bitxia da koadro honetako bi elementuen aukeraketa: sakonago aztertuta, ia esan daiteke kinkearen forma biribildu baina itxiak frutaontziaren forma orekatzen duela, guztiz zabaldutako korola baten antza baitu azken horrek.