Mark Rothko: argizko paretak

Iruzkinak

Titulurik gabea, 1948

Rothko hil eta gero, Forma anitzeko pinturak izenez ospetsu egin ziren konposizio serieko artelanetako bat dugu hau. Lan hauetan, Rothkok kolorean arreta berezia jartzen du; koloreak naturako irudien edo erreferentzien tokia hartzen du. Une horretatik aurrera, Rothkok kolorearen bidez islatuko du emozioa.

Forma anitzeko pinturak obra hauetan, kolorearen eremuak irregularrak dira. Mihiseak margo likidoak xurgatu ditu, eta ertz ahulak, zehaztu gabeak sortzen dira. Irudi batzuk profil zurixkez inguratuta daude, eta halo itxura dute. Garai hartan, mihiseen aurrealdea margotzeaz gain, aldeak ere margotzen zituen. Margolanak markorik gabe erakusten zituen, margotutako aldeak ikus zitezen.

Rothkoren ustez, bere lanetan objektu arruntik margotzen ez bazuen, argitasun handiagoa lortzen zuen. Izan ere, haren ustez, ikusleek ez zuten arreta galtzen halako objektuek ekartzen dituzten asoziazio mugatuekin. Aitzitik, ikusleak aske ziren margolanaren aurrean erantzun freskoa, emoziozkoa izateko. Helburu garrantzitsuena egia unibertsalak adieraztea zen. Beharrezkoak ez ziren xehetasunak kenduta, egia horietara zuzenago iristen zela uste zuen. 1949. urtean esan zuenez:

"Margolarien lanak argitasunerantz egin behar du aurrera, denboran puntu batetik bestera doan heinean. Hau da, margolariaren eta ideiaren artean dauden oztopoak kendu egin behar dira".