Alberto Durero: Städel Museum-en Bildumako grabatuak

Atalak

Apokalipsia

Apokalipsia liburuak munduaren amaieraren ikuspena deskribatzen du, Ongiaren eta Gaizkiaren arteko borroka latza eta, azkenik, bake-garaia, Jainko gorenaren babesean. Itun Berriaren liburu hori askok irakurri zuten Erdi Aroaren amaieran, erlijioaren inguruko zalantzak nagusi ziren garaian jendearen ziurtasun- eta argitasun-premia adierazten baitzuen, eta Erreforma ekarri zuen ondorioz. Durero-k liburu batean argitaratu zuen 1500. urtea baino lehen harialderako grabatuen lehenengo saila; formatu handiko grabatu bakoitzari zegokion testua pareko orrian agertzen zen, hau da, aurreko orriaren atzealdean; izan ere, ikusgai dauden orrialdeetako batzuetan atzealdean den testua antzeman daiteke. Aurreneko estanpa eta gero, Apokalipsiaren autore San Joanen martirioari buruzkoa, hark izan zuen ikuspena azaltzen da, Jainkoaren tronuaren eta gortearen inguruan eta, ondoren, gizakien gainean sortutako izurriak eta Zeruko indarrek Infernuko hainbat izakirekin izandako borrokaldia. Azkenean, Satan amildegian baztertzen dute, eta aingeru bat agertzen da Zeruko Jerusalem sortu berria San Joani erakustera. Garai hartan bertan egin zituen beste harialderako grabatu handi eta bereizi batzuetan bezala, Gizonak bainua hartzen edo Ercules grabatuetan adibidez, teknika grafikoak eskaintzen zituen baliabide urriekin aukera espresibo ugariak sortu zituen Durerok, eta horien artean kontrasteak eta bizitasun handiko formak nabarmentzen dira Apokalipsian.