Alberto Durero: Städel Museum-en Bildumako grabatuak

Atalak

Durero-ren azkeneko obrak

Durero-ren bizialdiaren azken hamar urteak Erreforma-garaia izan ziren Alemanian, eta hil arte Martin Luther-en jarraitzaile izan zen. Bere bizitzako azkeneko urte haietan erretratuak grabatu zituen, eta haietako batzuk eskariz egin bazituen ere, beste batzuk estimatzen zituen pertsonen omenez sortu zituen; inprimatutako erretratuak eta, beraz, erretratu publikoak ziren, haren ustez erabateko aldaketak sortzen ari ziren garaian. Pentsamendu protestantea testuetan oinarritzen zen batik bat; irudiek emozioak pizten zituzten eta jarrera hotzez eta kritikoaz ikusten ziren. Garai hartan hizkuntza ikonografiko berria eta soila garatzen saiatu zen Durero, azkenetako bere obra batean, Azken afaria grabatuan adibidez, antzeman daitekeenez, eta aldi berean, urteetan lantzen aritutako testu teorikoak idazten jarraitu zuen. Pintoreentzako liburu didaktiko gisa argitara atera zuen 1525ean Neurketaren ikasbidea, Natura behar bezala irudikatzeko eta batez ere perspektibako irudibilduari buruzko arau ugari biltzen zituena; arkitekturaren alorrean ere gaitasun handia erakutsi zuen Gotorlekuei buruzko ikasbidea liburuarekin, eta hil baino lehentxeago agertu zen Proportzioari buruzko hainbat ikasbide liburuan, giza gorputzaren inguruan urteetan egin izan zituen azterlanak argitara atera ziren.