Alberto Durero: Städel Museum-en Bildumako grabatuak

Atalak

Ama Birjinaren bizitza

Apokalipsia eta Nekaldi handia eta gero, Ama Birjinaren bizitza da Durero-k formatu handian egin zituen harialderako grabatuen hirugarren saila. Grabatu horiek gehienak Italiara egin zuen bigarren bidaiaren aurreko urteetan sortu zituen, 1505–1506 urteak baino lehen, hain zuzen ere. 1510ean osatu zuen saila eta 1511n argitaratu zuen Nekaldi handiarekin eta Apokalipsiaren edizio berriarekin batera. Ama Birjinaren bizitza sailak Mariaren guraso San Joakin eta Santa Anaren historia kontatzen digu, baita Jaungoikoaren Amaren jaiotza eta haurtzaroa, eta Jesusen haurtzaroa ere, amaren azken agurra jaso zuen arte. Heriotzarekin amaitzen da kontakizuna, Ama Birjinaren Jasokundearen eta Koroatzearen irudiekin. Sailean ez da ageri Ama Birjinak semearen Nekaldian parte hartu izana, haurtzaroaren eta amaren bozkarioaren gaietan oinarritzen baita. Beraz, harialderako grabatuen beste bi sail handiak orekatzen ditu emozionalki. Ama Birjinaren bizitza sailean nabaria da Durerok erdiko perspektiban agertzen diren espazioen eraikuntza landu zuela, eta batik bat italiarren obrak eta testu teorikoak ondo ezagutzen zituela.