Architecture Effects

Iruzkinak

MOS, Seinalerik gabeko denda (A Tent Without a Signal)

Seinalerik gabeko denda hausnarketa ganbera bat edo alegiazko areto espiritual bat da: barne bidaia batean murgil gaitezen diseinatuta dago berariaz, iparramerikarrek izerditzeko asmatutako etxolen edo espaziora bidaiatzeko ontzien tankeran. Babesleku hau New Yorkeko MOS estudioko arkitektoek sortu dute, ametsaren ekintzarekin esperimentatzen duen arkitekturari forma emateko xedez.

Arkitekturako arketipo primitiboenetakoa da denda. Egitura horrek lasaitasun ia formagabea izan ohi du bereizgarri; kasu honetan, ordea, lasaitasun hori tenkatutako kurba-sorta bilakatzen da, digitalki ehundutako tapiz futurista baten bidez, gurutze batek eta zirkulu batek osatutako oinarriaren gainean.

Denda tradizionalak haizetik, euritik eta naturako beste elementu batzuetatik babesten zuen. Seinalerik gabeko denda honek, berriz, gaur egun inbaditzen gaituzten elementuetatik babesten gaitu, hala nola, gure telefono eta beste gailu batzuek etengabe igortzen dituzten seinale elektromagnetikoetatik. Seinalerik gabeko dendak Faraday kaiola baten antzera funtzionatzen du; XIX. mendeko asmakuntza da hori, eta airearen bidez transmititzen diren seinaleetatik babesteko balio du.

Dendaren bilbea zuntz metalikoz ehunduta dago: zuntz horiek kanpoko gainaldean barreiatzen dituzte karga elektrikoak, eta karga horien presentziaz gabetzen dute barnealdea. Dendak, beraz, eragotzi egiten du uhin elektromagnetikoak zure telefonora hel daitezen, eta, hala, ez duzu gailu horren bidez komunikatzerik izango. Horren ordez, saia zaitez zure barne munduko seinale psikikoak heda daitezen, eta erreparatu gertatzen denari.