Asmamenaren ildoa
Alyson Shotz: Gogoeta-objektua (2017)
Alex Katz: Irribarreak (1993-1994)
Iruzkinak
Fischli & Weiss: Gauzen norabidea (1987)
- Izenburua:
- Fischli & Weiss: Gauzen norabidea (1987)
- Erakusketa:
- Asmamenaren ildoa
- Gaiak:
- Eragin artistikoa | Esperimentazio artistikoa | Sorkuntza artistikoa | Sormena | Lan-prozesua | Hondakinak | Materialak | Materialtasuna | Mugimendua | Teknika eta materialak
- Mugimendu artistikoak:
- Arte Garaikidea
- Artelan motak:
- Bideoartea
- Aipatutako artistak:
- Fischli, Peter | Weiss, David
Badirudi beren kabuz mugitzen direla eguneroko zenbait objektu, izan aulkiak edo pneumatikoak, izan etxeko erremintak edo sukaldeko tresnak. Bira-biraka dabiltza, errailetan barrena irristatuz eta airean hegan, harik eta talka egin, suak hartu, eztanda egin edo lur jo arte. Eta, hala, beste mekanismo bati eragiten diote. Eguneroko objektu horien arteko gertakizun-sekuentziak sortzeko, erreakzio horiek errazten dituzten propietate kimiko bereziak dituzten elementuak erabili dira, hala nola bolbora, gasa edo disolbatzaileak.
Ezer ez da kasualitatea. Peter Fischli eta David Weiss artista suitzarrek 1985ean eginiko prestakuntza-lan xehearen emaitza da mugimendu-engranaje hori guztia, urte hartan sortu eta koreografiatu baitzuten sekuentzia. Eskala handiko domino-efektu erraldoi hori kaos kontrolatu handia da, eta agerian uzten ditu kausa eta efektuaren arteko erlazioak. Baina itxuraz inolako funtzio edo helbururik gabe egiten du. Mekanismoren batek huts egin eta katea etenarazi ote dezakeen ziur ez jakiteak sortzen du suspensea. Ekintzen segida hori ikusteak ia umetakoa bezalako harridura eragiten du, balizko erreakzio bakoitzari aurrea hartzen saiatzen garen bitartean.
Ezustekoak gertatzeko aukerak hauspotuta filmak eragiten duen tentsioak haurtzaroko mundua esperimentatzeko modua ekartzen du gogora: jolasteko dugun gaitasuna gogorarazten digu. Izan ere, jolasak nolabaiteko fikzio-ituna eskatzen du, eta jolasa da, hain zuzen, artista horien sorkuntza-prozesuaren funtsezko zatietako bat. Aurretik egindako lan-sailetan ere erabiliak zituzten hemen ikus daitezkeenen antzeko eguneroko objektuak, eta nortasun metaforiko berri bat eman zieten, haiekin eszena fantastikoak sortzeko.
Kasu honetan, objektuek ez dute hartzen beren materialtasunetik kanpoko esanahi sinbolikorik. Eta etengabeko eraldaketan dagoen energia bera bihurtzen da protagonista gertaeren sekuentzia adimentsu honetan.