Chillidaren omenez
Anish Kapoor, Urmaela (2003)
Manolo Valdes, Horta de Ebro (Chillidaren omenez), 2003
Iruzkinak
Miquel Barceló, Maskorrak hutsik (2005)
- Izenburua:
- Miquel Barceló, Maskorrak hutsik (2005)
- Erakusketa:
- Chillidaren omenez
- Gaiak:
- Artea eta musika | Eragin artistikoa | Sorkuntza artistikoa | Kolorea | Ingurunea eta natura | Dualtasuna
- Artelan motak:
- Artisautza | Eskultura | Grabatua | Pintura
- Aipatutako artistak:
- Barceló, Miquel | Chillida Juantegui, Eduardo
Miquel Barceló-k orain gutxi egin du maskor hutsak irudikatzen dituen obra hau. Mallorca uhartean jaio zen, eta han piztu zitzaion muino idorrekiko, arrantzarekiko, eta ur-azpiko paisaiekiko grina. Palmako katedralean egin zuen lan erraldoiagatik da ezaguna. Izan ere, 300 metro koadrotik gorako horma-zeramika moldatu zuen, arrainen eta ogien mirakulua irudikatuz.
Hemen ikusgai dagoen obra Chillidari berari eskaini dio, eta, lan honetan, Barcelók alde batera utzi ditu hain ohikoak dituen koloreak, eta itzalez jositako lana sortu du, beltz- eta zuri-sorta handia baliatuz. Barcelók sarritan jorratu du itsasoaren gaia, eta hainbat ikuspegitatik landu du. Haren lan batzuetan, itsasoa goi‑goitik erakusten digu, eta masa trinkoaren itxura hartzen diogu. Beste obra batzuetan, aldiz, artistak itsas hondoan bertan irudikatzen du bere burua: hango bizitza oparoan barneratzen da, eta haren berri ematen digu, botanikari edo zoologo poeta baten antzera. Barcelók hondartzan bertan lan egin izan du, ia itsasoa ukituz. Batzuetan, harea, maskor zatiak eta alga hondarrak gehitzen dizkie lanei.
Obra honetako maskorrak angelu guztietatik aztertu ditu. Gorriz trazatuak daude, betiereko ur ingurunean edo osifikatutako materialean zintzilik. Behin eta berriz, haren lanek itsaso sakoneko formak, hondarrak, eskeletoak eta bizitza-arrastoak biltzen dituzte, hutsik dauden maskor hauen antzera. Maskorrak naturaren oparotasunaren eta aniztasunaren lekukoak dira, baina, aldi berean, heriotzaren eta bizitzaren iragankortasunaren berri ematen digute.
Obra honetako irudiak Bach‑en musikaren ikusizko metafora gisa ere sortu zituen. Konpositore handi horren lana inspirazio-iturri garrantzitsua izan zen Chillidarentzat. Izan ere, bost eskultura eta grabatu liburu bat eskaini zizkion Bachi berari. Are gehiago, Chillidaren lana musikaren sonoritateari oso lotua zegoela esan izan da.
Obra honi begiratuta, mihisearen azalean pigmentuzko ustekabeko efektuak ageri direla atzemango dugu. Hartara, artistak halabeharrari bide ematen dio. Izan ere, Barceló jabetua dago naturan izaten diren ordenarik gabeko arraildura eta pitzadurez. Obra hau egin baino urte asko lehenago, honako hau idatzi zuen bere eguneroko batean: “Ordena tokian tokikoa da; ordenarik eza, berriz, unibertsala”.