Migel Anjel eta bere garaia
Migel Anjel helduaroan eta bere garaian izan zuen eragina
Atalak
Migel Anjel eta Frantzia
- Izenburua:
- Migel Anjel eta Frantzia
- Erakusketa:
- Migel Anjel eta bere garaia
- Gaiak:
- Artea eta erlijioa | Artea eta politika | Artearen historia | Eragin artistikoa | Fontainebleauko Eskola | Frantzia | Antonio Mini | Frantzisko I.a | Julio II.a | Roberto Strozzi
- Aipatutako artistak:
- Buonarroti, Michelangelo | del Sarto, Andrea | dell'Abate, Niccolò | Fiorentino, Rosso | Parmigianino, | Primaticcio, Francesco | Romano, Giulio
Migel Anjel Frantziara joateko ahalegin guztiak alferrikakoak izan ziren. Litekeena da herrialde horretan bere ideiak Andrea del Sarto-ren bitartez hedatu izana eta, geroago, Rosso Fiorentino-ren bitartez. Bestalde, 1531n Antonio Mini Frantziara joan zen bere maisuaren marrazkiez betetako bi kutxarekin eta, izan ere, marrazki haiek azterlanerako balio handiko materiala izan ziren herrialde hartan lan egiten zuten artistentzat. Marrazki haietako bat Leda-ren erretratua zen, gaur desagertutakoa, zegokion kartoiarekin. Eskultore gisa Migel Anjelek zuen fama 1529-1530ean Frantzisko I.a erregeak jaso zuen marmolezko Herkules kolosalari esker zabaldu zen Frantzian, baita Roberto Strozzi-k 1550. urtearen inguruan hara eramanarazi zituen Julio II.aren hilobiko bi esklaboei esker ere.
1530ean Rosso Fiorentino Frantziara joan zen, bere lagun Migel Anjeli esker seguruenez. Parisko eta Fontainebleauko gorteko errege-pintore gisa aritu zen lanean, eta Fontainebleauko jauregiaren dekorazioan jardun zuen bere kargura zeuden artista ugarirekin batera. Primaticcio-rekin batera Fontainebleauko eskolaren sortzailetzat hartzen da. Bere maisu Giulio Romano-ren eta Parmigianino-ren eraginpean, Primaticciok Rossoren estilo espresiboa eta aldi berean gortekoa eta fina garatzen jarraitu zuen. Horrez gain Migel Anjelen elementuak ere hartu ohi zituen sarritan. Izan ere, Erromara egindako zenbait bidaiatan topo egin zuen harekin. Fontainebleauko jauregia dekoratzeko, 1552tik aurrera Primaticciok Niccolò dell’Abate-ren laguntza handia izan zuen, bere marrazki batzuetan Migel Anjelen ideiak ere jaso zituen artista izanik.