Chacun à son goût

Iruzkinak

Sarrera

Ongi etorri Chacun à son goût (Bakoitzaren nahiera) erakusketara. Euskal arte garaikidearen erakusketa honek badu berezitasun bat: hamabi artista partehartzaileek artelanak erakusketa honetarako berariaz sortu dituzte. Proiektua Guggenheim Bilbao Museoaren hamargarren urteurrena dela-eta sortu zen, eta artistak bi irizpide nagusi hauen arabera hautatu ziren: ez zuten dagoeneko Museoaren Bilduman egon behar, eta gure aurreko erakusketetan ere parte hartu gabekoak izan behar zuten. Helburua euskal artista talde garaikide baten sormena bultzatzea zen, erakustokia izango ziren espazioekin elkarreragingo zuten lanez baliatuta. Sortzaile-talde hau 1990. hamarkadaren amaieratik aurrera irmotutako belaunaldikoa da, eta euskal artearen ikuspegiaren barnean kokatzen dira, bai taldekideak Euskal Herrian jaio eta hazi direlako, edo bai hemen hezi eta lana garatu dutelako.

Erakusketaren izenburuak, Chacun à son goût, ekimen horren emaitza islatzen du, hau da, estilo-aniztasuna, desberdintasunarekiko errespetua, eta, ohartzea, gustu pertsonala norbere egoeraren nahiz egoera sozialaren arabera zehazten den zerbait dela. Esapide frantsesa Denis Diderot XVIII. mendeko pentsalariak ematen zion esanahiagatik hautatu da, hain zuzen ere, pasioa, sena eta irudimenerako sentikortasuna goresten baitzituen, banakakoak komunitatearen barnean nolabaiteko autonomia gordetzeko bide gisa.

Horri guztiari ikuslearen esperientzia gehitu behar zaio. Rosa Martínez, erakusketaren komisarioaren arabera, “proposamen hauek eragin dezaketen gustua edo disgustua, funtsean, ikuslearen ikuspegiaren araberakoa da. Ikusleak […], interpretazio bat egiten duenean, aktiboki laguntzen du lan horri zentzu bat ematen, eta, beraz, lanaren esanahi indibiduala eta kolektiboa sortzen”.

Museoaren hirugarren solairua osorik hartzen duen erakusketa aske bisita dezakezu.