Alex Katz. Hemen eta orain

Iruzkinak

5 ordu (5 hours)

1990eko hamarkadaren erdialdean, bideoz grabatu zuten Katz Ada emaztearen lehen plano bat margotzen ari zela, neguko paisaia baten aurrean, SoHoko estudioan. Han aritzen da lanean 1968tik. Grabazioaren ekoizpen-lanak semeak eta errainak egin zizkioten. Semea Vincent Katz poeta eta arte-kritikaria da, eta erraina, berriz, Vivien Bittencourt argazkilari eta ekoizlea. Katzek margolana egiteko behar izan zituen bost orduak 20 minutuko bideo batean bildu zituzten, laburtuta. Hitzik gabea da bideoa, elkarrizketarik gabea, Katzen lagun Meredith Monk-en musika konposizio batzuk bakarrik ditu.

5 ordu lanaren ardatza artistaren estudioko lanaren mugimendu bizkorra da, atletikoa dela ere esan daiteke. Hor ikusten da artistaren izaera “bizkorra eta elektrikoa”. Bideoa egin zutenean, 65-66 urte zituen Katzek. Eta esan daiteke, are energia gehiago duela orain, ordutik hogei urtetik gora igaro diren arren.