Alex Katz. Hemen eta orain

Iruzkinak

Amaren ametsa (My Mother’s Dream), 1998

Amaren ametsa lanak zortzi metro eta erditik gorako luzera du eta Katz-en lanik iradokitzaileenetako bat da; bai izenburuagatik, bai hizkera formalagatik eta poetikoagatik.  

Lau panel daude, zabaldutako lau leiho balira bezala eta eszena bakarrera garamatzate laurek; laurak ordu berean, iluntzeko zazpiak eta berrogeita bostean, baina bakoitzak asteko egun batean, astelehenetik ostegunera. Lau irudietan ordua bera den arren, iluntzeko eguzkiaren distira aldatu egiten da batetik bestera eta horrek eten egiten du denboraren eta espazioaren linealtasuna.

Nolanahi ere, badirudi konposizio honek poema baten metrikaren edo musika-lan baten erritmoaren egitura duela. Alex Katzen hitzetan, margotzeak “norberaz kanpoko gauzekin konektatzera garamatza eta horrek, barruan dugun hori kanpora ateratzen du”.

Irudia mihise bakarrean hainbat aldiz zatitzea ohikoa da Pop Artean baina, berez, 1950eko hamarkadan Katzek asmatutakoa da. Beraz, esaten da Pop Art mugimenduaren aitzindaria izan zela Katz, baina hori ezeztatzeko moduan gaude. Mugimendu hura baino lehenago ibili zen Katz. Behin artistak adierazi zuen  bera ondoen deskribatzen zuen terminoa “pop aurrekoa” zela, eta gehiago ere esan zuen; bere margolanak “Europako pintura tradizionalari lotuta daudela eta ez Pop Arteari”.