Alex Katz. Hemen eta orain

Iruzkinak

Isla 7 (Reflection 7), 2008

Uretako islak beti izan dira idazleen eta poeten inspirazio-iturri eta horren adibide garbiena Nartziso ederra da, bere buruaren irudiaz maitemindu zen gizon ederra, hain zuzen.

Erakusketa honetan ikusiko dugu Alex Katz-en lanetan ere askotan azaltzen direla islak. Margolan honetan, gainera, bikoitza da isla: bata paisaiarena da, uraren azalean, eta bestea alboan duen irudi simetrikoa, ardatz bertikalaren araberakoa. Baina ea bere lanek asmo psikologikorik ba ote duten galdetu ziotenean, hona zer erantzun zuen Katzek:

“Hor daude, baina ez zaizkit interesatzen. Nire margolanak orainerako dira, horretarako margotzen dut nik. Batzuek biharko egiten dute eta nik, berriz, gaurko, musika balitz bezala. Margotzea oso teknikoa da, oso urrunekoa eta nik orainarekin lotu nahi dut. Jazza bezalakoa izatea nahi dut”.

Katzek aipatu ditugun isla horietan duen interesa hautematearen fenomenoari lotua dago. Beti liluratu izan du fenomeno horrek. Katzek paisaiaren islak margotzen dituenean, ur-azalean alderantziz azaltzen dira eta Katzek, horren bidez, zeharka aipatzen du, nola hautematen ditugun irudiak: alderantziz proiektatzen baitira erretinan, harik eta, ondoren, garunak zuzentzen dituen arte.