Degas-etik Picasso-ra: pintoreak, eskultoreak eta kamera

Atalak

Franz von Stuck

Franz Von Stuck mende amaierako Alemaniako artistarik ezagunenetakoa izan zen. Ponpeiar estiloko bere etxebizitza-estudio ikaragarria (gaur egun Museum Villa Stuck hartzen duena) Munich hiriko artistaren arrakasta artistikoari eta sozialari egindako monumentua da. Stuck eta bere emazte Mary Lindpainter-en argazkietan, erromatar jantziekin agertzen dira, artistaren mozorro-dantza bohemiar baten oroigarri.

Argazkigintza Stucken artearen zati izan zen. Moreau-k bezala, bere modeloen argazki asko eta asko egin zituen. Modelo hauek kontu handiz kokatzen zituen, osagarri konplexuz apainduta, haiei egindako argazkiak bere behin betiko mihiseen hasierako “zirriborrotzat” erabiltzen zituelarik. Bere alaba Mary, jantzi greko bat jantzita edo Velázquez-en Infantaren erretratu ezaguneko errege-edergarriez apainduta, modelo gisa erabili zuen askotan. Stuckek ukituak egiten zituen argazkien gainazaletan bere konposaketen zenbait alderdi hobetzeko. Berak ere atsegin nabarmenez eta antzerki-jite handiz posatu zuen bere emazte Maryren kameraren objektiboaren aurrean, hurrengo artelanetarako beharko zuen jarrera eta aldarte zehatzekin.

Tilla Durieux aktoreari Zirtzeren paperean egindako erretratu txundigarria, erretratua bera bezain adierazgarria zen argazki-estudio batean oinarritzen zen. Mary kapelu ilunarekin ohartxoz betetako argazki-bilduman hausnartze-prozesuak erakusten dira, eta prozesu horien bidez argazki-estudioak olio-pintura guztiz amaituetan irudikatzen dira.