Bilbo eta pintura
José ARRUE, Estropadak Abran. Alfontso XIII.a Algortako itsasargian (Regatas en el Abra. Alfonso XIII en el faro de Algorta), 1908
Adolfo GUIARD, Ehiztariak Iparraldeko geltokian (Cazadores en la Estación del Norte), 1887
Iruzkinak
José ARRUE, Athletic Club taldea (Equipo del Athletic Club), 1915
- Izenburua:
- José ARRUE, Athletic Club taldea (Equipo del Athletic Club), 1915
- Erakusketa:
- Bilbo eta pintura
- Gaiak:
- Artea eta gizartea | Artea eta historia | Artea eta kirola | Ibilbide artistikoa | Sorkuntza artistikoa | Kolorea | Talde-erretratuak | Gizarte-kronika | Marrazkigintza | Athletic Club de Bilbao | Kultura | Bilbo | Bizkaia | Pertzepzioa | Teknika eta materialak
- Mugimendu artistikoak:
- Modernismoa
- Teknikak:
- Gouache
- Artelan motak:
- Pintura
- Aipatutako artistak:
- Arrue Valle, José
José Arrue, hala Bilboko nola inguruko herrietako bizitza sozialaren dokumentalista handia izan zen. Bere belaunaldiko beste artista askok bezala, lehenik bere hirian eta, ondoren, Parisen jaso zuen prestakuntza. Italia eta Andaluzia ere bisitatu zituen, eta azken horretan sortu zitzaion zezenketen munduarekiko zaletasuna. 1908an Bilbora itzuli ondoren, marrazkilari eta karikaturagile lanetan aritu zen bertako eta Estatuko hedabide grafikoetan.
1915ean, Bilboko Athletic Club-ek taldearen erretratu bat egiteko eskatu zion Arrueri. “Iparraldeko lehoiak” izenez ere ezagutzen zen taldeak Erregearen Kopa irabazi zuen 1914an eta 1915ean. Kontuan hartu behar da estatu osoan futbolean jokatzen hasi zen lehenengo tokietako bat izan zela Bizkaia, Ingalaterrako marinelek eta enpresa siderurgikoetako teknikariek kirol hura ekarri baitzuten 1890eko hamarkadan.
Athletic Club taldea margolana taldeko erretratu klasikoa da, zeinetan ia pertsona guztiak aurrez aurre agertzen diren; koadroan, primeran hauteman daiteke haien fisionomia, margolariaren trebetasun teknikoari esker. Hamaika jokalariak agertzen dira, taldeko uniformea jantzita, bai eta William Edwin Barnes entrenatzailea eta haren laguntzaile Manuel Ansoleaga ere, futbol-zelaiko atearen aurrean.
Margolan ia fotografiko honetan, artistak zenbait interpretazio egiteko atrebentzia izan zuen: profilez eta handiago marraztu zituen Ibarreche atezainaren eta garai hartako heroi Rafael Morenoren irudiak. Morenori Pichichi izengoitia eman zioten zelaian oso mugimendu arinak zituelako eta, harrezkero, halaxe deitzen zaie Espainiako futbol-ligan gol gehien egiten dituztenei. Frisoak talde-sentimendua areagotu eta, aldi berean, jokalari bakoitza bereizten du, bakoitzaren keinu, gorpuzkera eta aurpegiera marraztuta.