Asmamenaren ildoa

Atalak

Irudikapen-moduak

Atal honetako obra figuratiboek ondo irudikatzen dituzte artisten askotariko ikuspegiak

giza irudikapenaren gaiari heltzean. Egile hauentzat, esperimentaziorako gonbidapen

bat da erretratua. Batzuek ikuspegi intuitibo eta berritzailea darabilte zeharo espresiboak

diren pinturak sortzeko; beste batzuek, berriz, modu errealistago batean heltzen diote

gaiari. Figurazioak eta abstrakzioak ezarritako elkarrizketa-modu desberdinak kontuan

hartzen ditu instalazioak; bi bide horiek zenbaitetan artista zehatz batzuen lanean daude

integratuta, esaterako, Georg Baselitzen Lenin andrea eta Urretxindorran (2008) eta Henri

Michauxen Titulurik gabean (1981); bi obra hauetan nolabaiteko abstrakzio-maila lortu da

eta, aldi berean, osagai figuratiboa mantentzen da.

Serieko errepikapena, mihise bat baino gehiago erabilita edo konposizio bakar baten

barruan, areto honetan bildutako egileetako batzuek erabilitako estrategia da. Alex Katzen

Irribarreak (1993–94) sailak artista horren azterketa formala eta kontzeptuala erakusten

ditu figuraren motiboa baliatuta, figuraren eta hondoaren arteko erlazio tradizionala

arakatzeko tresnatzat erabilia. Artistaren helburua ez da modeloen nortasuna erakustea,

irudikapenaren izaerari eta irudien pertzepzioari buruzko hausnarketa sakonago bat

eskaintzea baizik. Konposizioan, enkoadraketa bera, figuraren eta hondoaren tratamendua,

eta keinua —irribarrea—errepikatuz, pertsonaia zehatzean baino, erretratu desberdinetatik

sortzen den esperimentazio piktorikoan arreta jartzera eramaten du Katzek behatzailea.

Bere ibilbidean zehar, Antonio Saurak sail tematikoetan jardun zuen lanean, areto honetan

hautatutako obrek osatzen dituzten hiruak barnean direla: Gurutziltzaketak, Jendetzak eta

Alegiazko erretratuak. Informalismoari lotua, Saurak keinu-trazu espresiboak darabilzki figurak

irudikatzeko orduan eta emozio biziak azaleratzen ditu mihisean, paleta murriztu bat erabili

arren. Halako kutsu sarkastikoa darion Napoliko gizona (1982) Jean-Michel Basquiaten obra,

berriz, artistaren mezenasetako baten erretratu zorrotz bat da. Koadro honetan figurazioa

eta testua, sinboloak eta kolore-orbanak elkartu zituen, gaurdaino indarrean jarraitzen

duten botere-egiturei buruzko kritika soziopolitiko sendo bati bide emateko.