Serra/Seurat. Marrazkiak

Iruzkinak

Serra. Ibilbideak (Ramble Drawings) [2]

Ramble Drawing edo Ibilbide hauetan, bi metodo ezberdin erabilita aplikatzen da arkatz litografikoa: transferentzia bidez eta orriaren gainean zuzenean markatuta. Lehenengoaren kasuan, transferitutako materia-karga handiagoa edo txikiagoa da aplikatutako presio-mailaren arabera, eta, beraz, obra batzuetan lanbro arin bat dirudiena orban ilun eta lauso suertatzen da beste batzuetan. Zuzeneko aplikazioa bestelako prozesua da, izan ere, paperaren gainean erabilitako material koipetsuaren kopurua kontrolatzea ahalbidetzen du, eta, gainera, emaitza oso desberdina sortzeko aukera ematen du. Arkatzaren beltzak eta pastel-hautsak, beren ñabardura guztietan, liluragarri egiten dute marrazki horiek, bakarra bada ere, behatzea; bat baino gehiagoren aurrean jartzea, berriz, gozamen estetiko soiletik haratago doan konparazio-ariketa ere bada, ulermenerako beste mekanismo batzuk erabiltzera behartzen gaituena.

Honela azaltzen du Serrak prozesua: “Marrazkia egiteko prozesuaren zatirik handiena materiala prestatzean datza. Denbora berbera ematen dut landu beharreko gainazala prestatzen eta marrazkia bera egiten. Marrazten, hamabost-hogei minutu inguru ematen ditut, batzuetan ordubete edo ordu eta erdi ere bai. Materiala prestatzen, berriz, bi ordu ere behar izaten ditut... Beti... Izan ere, nahasketa desberdina izaten da marrazki bat egiten duzun bakoitzean. Baina, gainazalari erreparatzen badiozu, ikus daitekeen bezala, zati batzuetan likidoagoa da, eta beste batzuetan, berriz, solidoagoa. Marrazki honek, adibidez, beste honek baino lau bider material gehiago behar du”.