Ruth Asawa: Atzerabegirakoa

Iruzkinak

Diseinu komertzialak, 1950eko hamarkadaren hasiera

1950eko hamarkadaren hasieran, Asawak San Francisco State College delakoan —gaur egun, San Francisco State University— jarraitu zituen ikasketak, eta dantza, diseinu komertziala, errotulazioa, serigrafia eta pintura ikasi zituen bertan.

Zenbait tokitan jarri zuten ikusgai bere lana, besteak beste, Laverne Originals izeneko barne-diseinu etxeak San Frantziskon eta New Yorken zituen erakustaretoetan, baita Vogue eta beste zenbait aldizkaritan ere.

Urte haietan, Asawak diseinu-sorta zabal bat egin zuen, nola diren papiroflexia-piezetan oinarritutako plastikozko panelak, edo paper margoturako eta ehunkietarako estanpatuak, azken horiek askotariko motibodunak, hala nola meandroak edo are bere seme-alaba txikien oinatzak.

Laverne Originalsek alanbrezko saski apaingarriak masan ekoiztera gonbidatu zuen Asawa, baina artistak uko egin zion proposamenari, esperimentazio artistikoan zentratu ahal izateko.

Titulurik gabea (S.691, Marra horizontaldun hormarako paper-tolesa) [Untitled (S.691, Wall-Mounted Paperfold with Horizontal Stripes)], 1951

Atal honetan ikus daitezkeen paper tolestuko obrek agerian uzten dute Asawak origamiarekiko zuen interesa, eta nabarmenak dira Black Mountain College ikastegian Josef Albers maisuaren eskoletan eginiko ariketak ere.

Gogoan zuen ikasleek papera tolesten zutela material horren egitura-aukerak aztertzeko, eta gero lautu egiten zutela atzera, nola erantzuten zuen ikusteko.

1951ko Titulurik gabea (S.691, Marra horizontaldun hormarako paper-tolesa) lanean, sigi-sagan jarririko tolesturek tontor erritmikoak sortzen eta itzalak proiektatzen dituzte; tinta-zerrenda horizontalek, berriz, areagotu egiten dute efektu optiko orokorra.

Gerora, Asawak antzeko egitura bat moldatu zuen plastiko teleformatuzko horma-estaldura baterako, eta estaldura hori 1959an patentatu zuen.