Ernesto Neto. Naraman gorputza
Atrioa
Ametsen etxea (Oca de Sonhos)
Iruzkinak
Bizitza gorputz bat da: haren zati gara (A vida é um corpo do qual fazemos parte)
- Izenburua:
- Bizitza gorputz bat da: haren zati gara (A vida é um corpo do qual fazemos parte)
- Erakusketa:
- Ernesto Neto. Naraman gorputza
- Gaiak:
- Gizakia | Generoa eta sexualitatea | Giza gorputza | Artea eta pertzepzioa | Artea eta emozioa | Ehungintza-artea | Sorkuntza artistikoa | Kolorea | Natura | Gogoeta
- Artelan motak:
- Artisautza | Eskultura
- Aipatutako artistak:
- Neto, Ernesto
Ernesto Neto-k Bizitza gorputz bat da: haren zati gara (A vida é um corpo do qual fazemos parte) izena jarri dio pieza honi. Artistaren ustez, ez dago bereizketarik gizakien eta naturaren artean. Gure buruak eta pentsamenduak, asmatzen edo eraikitzen dugun guztia, naturatik dator.
Obra-serie honen diseinua zelulen mintzetan dago oinarritua. Hormak eskuz ehundu dituzte kakorratz-teknika berezi baten bidez. Hainbat koloretako zelulak egin dituzte, kiribilak osatuz. Obraren egitura hodi-formako zelulek osatzen dute. Barruan airea duten plastikozko bolaz daude hodiak beteak. Bi zati ditu, maskulinoa eta femeninoa, korridore esekia eta goiko aldeko plataforma. Pieza honek ernalketa birsortzen du; espermatozoide bat obuluan sartzen den unea, bizitzaren hasiera, alegia.
Netok dio urte askoan izan duela espazioaren bidez, lurraren gainetik mugitzeko nahia, edo airean, atmosferan, igotzeko eta flotatzeko lerro bat marrazteko nahia. Pieza honen bidez bertigo-sentsazio arin bat sortzeko asmoa izan zuen eta egonkortasunari buruz pentsatzera gonbidatzen gaitu. Egonkortasuna, batzuetan, ziurtzat jotzen dugu. Artistaren hitzetan, lan honek “mugitzeko, desiratzeko eta beldurtzeko modua” birplanteatzeko gonbitea egiten digu.
Obran sartu baino lehen, entzun atal hau osorik. Entzun ondoren, kendu oinetakoak eta utzi zure gauza guztiak (entzuteko gida ere bai) horretarako jarritako armairuetan. Aretotik irtetean jaso ahal izango dituzu.
Herensuge-formako labirinto erraldoi honetara nola sartu asmatzen duzunean, utzi egingo diozu lurrean egoteari. Murgildu oinpean dituzun plastikozko bolen hotsean eta inguruko sareen usainean eta ukimenean. Egin gora, gero eta gorago. Igotzean, sentitu obraren gorputz osoa nola astintzen den eta nola egiten duen dar-dar. Une erosoak eta deserosoak tartekatuko dira. Gora iristean, etzan eta gozatu. Han goian, arretaz aztertu ahal izango dituzu zure emozioak eta atseden hartu, bizimoduaren eromenezko erritmoa eta konplexutasunak alde batera utzita.
Orain bai, prest zaude sartzeko.