Robert Rauschenberg: Gluts

Iruzkinak

Chrome Castle Glut (Neapolitan), 1987

Lan hau Neapolitan Glut bat da, hau da, erakusketa honetan ikusiko dituzun beste Neapolitan lanekin batera, Rauschenberg-ek Trisha Brown-en Alboko pasea balletaren dekoratu gisa sortu zuen Napolin, Italian, azken unean, 1986–87ko Urte Berriko oporretan. Trisha Brownek istorioaren zati bat kontatzen du:

“Bobek esan zuen ‘Dekoratu berri bat egingo dut Alboko paserako’. Pozez txoratzen nengoen onartu nuenean eta, orduan, nabarmendu nion koreografia zazpi dekorazio-pieza erraldoi... antzezlekuaren erdian erortzeko diseinatua izan zela. Dekoratua koreografian izateaz gain, piezak gora eta behera mugitzen dira, dantzariei pasatzea uzten edo eragozten...”.

Lankidetza hori Nancy Graves-en jatorrizko dekoratua, New Yorketik heltzekoa zena, Genoako kai-langileen greba bat zela-eta atzeratu zenean hasi zen. Rauschenbergek, ikuskizuna ikusteko Napolin zela, bere burua eskaini zuen eta, hiriko kaleetan eta txatartegietan bila ibili ondoren, dekoratu berri bat egin zuen hiru egunetan. Neapolitan Gluts lanak interesgarriak dira eszenatokian behin izan zuten eginkizunagatik eta zuzeneko emanaldiekin duten erlazioagatik ez ezik, materiala Napolikoa eta ingurukoa zelako, Floridako txatartegiez nahiko bestelako ingurune batekoa alegia. Hala ere, bere artea egiteko Rauschenberg eroso zegoen bere estudioan zein edozein hiritako kaleetan.

Lan honetan bihurgune itxia berehala seinalea gehitu zuen, egun errepideetan daudenen berdina. Napolin egindako dantzaldiaren ostean, Brownek Alboko paseko jatorrizko dekoratua erabili zuen eta Rauschenbergek, hartara, atakatik ateratzeko egindako dekoratua moldatu eta bertatik banakako eskulturak sortzeko aukera izan zuen.