Art in the USA: 300 urteko berrikuntza

Atalak

Zabalkuntza eta zatiketa (1830–1880)

Independentzia Gerraren (1775–83) ondoren, nortasun nazionala eraikitzeko premiak bultzatu egin zituen sortu berri ziren Estatu Batuetako hiritarrak iparramerikar izatearen esanahiari buruz eztabaidatzera. Errepublika berrian, arte ederren sustatzaileek objektu ez-erabilgarrien existentzia justifikatu behar izan zuten, objektu horiek demokraziarekin bateragarri ziren sinbolo eta ikur bilakatuz. 1820ko hamarkadan, genero-eszenek —nazioaren garaiko bizitza eta paisaia deskribatzen zuten pinturek— uste sendo bat irudikatzeko modu bat eskaini zieten artista estatubatuarrei eta haien mezenasei, alegia, Estatu Batuak eta bertako hiritarrak zuten askatasun indibidualagatik eta ekonomikoagatik apartekoak zirela.

Iparramerikako genero-pinturek demokrazian bizi zen herrialde bateko gizabanako arruntaren existentzia eta egunerokotasuna goraipatzen zituzten. Genero-pintorearen helburua dibertitzea zen, edota behatzaileak euren buruak edo auzokoenak bizitza arruntaren eta egunerokoaren pasadizoak jasotzen zituzten eszenetan islatuta ikustea. Hala, genero-pinturak kontzientzia nazionala garatzen lagundu zuen herrialdean bizi ziren oso biztanle desberdinen artean.

Amerikako paisaia-pinturek lur basatiak erakusten zituzten egoera puruan, baita mugarik ez duela ematen duen zanpatu gabeko kontinentearen hedadura ere. Gainera, pintura hauek nazioaren etorkizuneko handitasunaren sinbolo ziren eta dotrina politikoan eta teoria filosofikoan inspiratuak zeuden. 1836 eta 1860 urte bitartean, transzendentalismoa —Jainkoa naturari eta gizakiari atxikita dagoela sinestea— nagusitu zen Estatu Batuetako bizitza intelektualean. Mendearen erdialdera, Manifest Destiny-ren (Ageriko Halabeharra) misio ideologikoak —jainkoak aginduta mendebalderantz hedatu eta demokrazia eta askatasuna zabaltzea— herrialdeak kontinente osoan zehar izango zuen hazkundea eta garapena legitimatu zuen iparramerikar gehienentzat.