Paul Pfeiffer: Askatasunaren sorrerari buruzko kondairaren hitzaurrea

Iruzkinak

Askatasunaren sorrerari buruzko kondairaren hitzaurrea (Prologue to the Story of the Birth of Freedom), 2000

Askatasunaren sorrerari buruzko kondairaren hitzaurrea izeneko obra hau bi kanalekoa da, hau da, bi bideoz osatua dago, eta berak ematen dio izena erakusketari.

Piezan Cecil B. DeMille zinema-zuzendaria ageri da Hollywoodeko Grauman’s Egyptian Theatre antzokiko agertokian, Hamar aginduak film epikoa aurkezteko hitzaldi bat ematear delarik.

Pelikula hura 1923an filmatu zuten lehenbizikoz, eta beste bertsio bat egin zuten 1956an. Bibliako Exodoa kontatzen du, bai eta Moisesek hebrearrak Egiptoren uztarritik askatu zituenekoa ere.

Pfeifferren obran, begizta infinitu batean harrapatuta geratzen da DeMille: agertu eta desagertu egiten da antzokiko oihalaren atzean, eta inoiz ez da iristen hitzaldia ematera.

Pfeifferren lan guztiekin gertatzen den bezala, obra honen geruza ugarietan barneratzen garen heinean, ikusten dugu Exodoaren historiak baduela islarik oraintsuagoko beste arazo unibertsal batzuetan, hala nola esklabotzaren abolizioan, deskolonizazio-mugimenduetan, eta mundu zabalean gertatzen diren askatasunaren aldeko borroketan.

Inoiz entzungo ez badugu ere, hauxe adierazi zuen DeMillek mikrofonora hurbildu zenean:

“Ikustear zaudeten filma askatasunaren sorrerari buruzko kondaira da”. Jarraian, filma hasten da lan neketsura behartutako esklaboen eszenarekin.

Izenburuak badu beste erreferentzia bat ere, Abraham Lincolnek Gettysburg hirian 1863an eman zuen diskurtsoaren pasarte ospetsu bat, alegia:

“Nazio honek, Jainkoaren hegalpean, izan dezala askatasunaren sorrera berri bat; eta gobernua —herriarena, herritik, herriarentzat— ez dadila lurretik desager”.

 [Pfeiffer]

“Iruditzen zait badela ikuspegi jakin bat, Estatu Batuetako kulturan hazi izanaren egiazko esperientziatik sortua, kultura kolonial horren hondarra baino geratzen ez den lekuetan hazi izanaren ondorioa. Estetikoki esperimentatu dut hori arkitekturan eta hizkuntzan, tankera horretako formetan. Baina baita psikologikoki ere, familiarekin eta, oro har, jendearekin ditudan harremanetan”.

“Zein izan ote daitekeen Estatu Batuetako kulturaren esperientzia jakin hori, esperientzia bikoitz moduko bat bizi baduzu, era berean barruan eta kanpoan egonda”.