Nam June Paik-en munduak

Iruzkinak

Bere ibilbidearen lehenengo etapa

Nam June Paik Seulen (Korea) jaio zen 1932an. Oso gaztetandik familiak beretzat nahi zuen bizitza profesional burgesa gaitzetsi zuen eta mendebaldeko musikarako zuen interesak bere kulturaren konbentzionalismoak haustera eraman zuen. 1949an Korean sortzeko zorian zen gerrak eraginda, bere familia Hong Kongera joan zen eta, beranduago, Tokiora. Tokioko unibertsitatean musika, artearen historia eta estetika ikasi zituen, eta ikasketak amaitzean lizentziatura-tesia idatzi zuen Arnold Schoenberg konpositore austriarrari buruz. Europako musika garaikiderako zuen interesak bultzatuta Alemaniara joan zen 1956an, eta bertan bere ibilbidean eragin handia izan duten pertsona ugari ezagutu zituen, esate baterako Karlheinz Stockhausen eta John Cage konpositoreak, Charlotte Moorman biolontxelojolea eta Joseph Beuys abangoardiako artista handia. Paikek hauxe zioen pertsona horietako batzuei buruz:

Nire bizitzan zorte izugarria izan dut John Cage ezagutzean, gurutzat baino gehiago probokatzailetzat hartzen zutenean, bai eta Joseph Beuys ere, Düsseldorfen ermitau xelebre bat besterik ez zenean. Hala hasi nintzen bi maisu handi haiekin harremanetan, berdinen arteko baldintzetan, eta haiek ospea lortu eta gero ere horrela izan da.

Abangoardiako maisu handi horiekin zuen harremanari esker Paiken izena ezaguna zen jadanik New Yorken, 1964an bertara bizitzera joan aurretik. Izan ere, abangoardiako mugimenduaren artista esperimentalenetako bat zela zioten, batez ere bere aparteko “ekintzengatik”, zeinetan eszenifikazio biolentoak zuzenean egiten baitzituen.