Nam June Paik-en munduak

Iruzkinak

Kandela bat (kandela-proiekzioa)

Kandela bat (kandela-proiekzioa) lana 1988koa da. Bertan, Paik-ek kandela bakar baten sugarrak forma anitzak eta harrigarriak sortzea lortzen du. Bideo-proiektoreen bateria handiak kaleidoskopikoki emititzen ditu irudiak inguruko espazioan. Paikek bideo-proiektorea eskala handiago batean mugimenduzko irudiak erakusteko baliabide gisa erabiltzen du.

Bideo-proiektoreen erdian piztua dagoen kandela bat jarriz, Paikek analogia bat ezartzen du argi-iturri naturalaren eta gaur egun ohikoagoak diren argi-iturri iraunkorren artean, hau da, suaren eta bideoaren eta telebistaren artean. Ideia honek bere aurreko beste instalazio baten izenburu adierazgarria gogora ekartzen digu, hau da, Ilargia TB zaharrena da. Argien jokoa beti izan da funtsezkoa Paiken obran, bai eta bere azkenaldiko laser-instalazioetan ere. Gainera, interes handia erakusten du sinpletasuna eta konplexutasuna, natura eta teknologia gainjartzearen aurrean. Hemen, sugar soil hau ekipo elektroniko konplexu batez inguratuz ezartzen du kontraste hori. Berak esan bezala:

Gure bizitza zati berdinetan dago banatuta naturaren eta teknologiaren artean, eta hori ona da, ezin baitugu ukatu teknologiak aurrerabidea dakarrela eta lan egiteko behar dugula. Hala ere, goi-mailako teknologia bakarrik sortzen badugu, horrek gure arteko gerra ekarriko du. Beraz, giza sentimendu sakona behar dugu moderazioa eta bizitza naturala iraunarazteko.