Henri Rousseau
Inauterietako gaua (Un soir de carnaval), 1886
Iruzkinak
Sarrera
- Izenburua:
- Sarrera
- Erakusketa:
- Henri Rousseau
- Gaiak:
- Eragin artistikoa | Ibilbide artistikoa | Sormena | Kolorea | Konposizioa | Eszena-generoa | Paisaia | Natura | Frantzia | Ametsak
- Mugimendu artistikoak:
- Arte Figuratiboa | Arte Garaikidea | Primitibismoa
- Artelan motak:
- Pintura
- Aipatutako artistak:
- Rousseau, Henri
Ongi etorri Guggenheim Bilbao Museora eta Henri Rousseau-ri buruzko pintura-erakusketara. Artista frantses hori 1844an jaio eta 1910an hil zen.
Henri Rousseauk ezohiko arte-prestakuntza izan zuen. Langile-klaseko familia errespetagarri batean jaio zen, baina bederatzi urte zituela guztia galdu zuten aitaren negozio-espekulazio txar baten ondorioz. Gizon gaztea zela Frantziako armadan emandako aldiaren ondoren, 22 urtez jardun zuen Parisen muga-zergak biltzen eta, harrezkero, Rousseauri “Mugazaina” ezizena eman zioten. 40 urte zituela hasi zen pintatzen, bere bizilagun Félix-Auguste Clément izen handiko artistak hartara bultzatuta. Batere arte-heziketa formalik ez zuela, Rousseauk bere bidea aurkitu behar izan zuen. Artista aitortuek moduan espazioa modu errealistan eman ordez, beste bide bat hartu zuen eta bere lana askoz intuitiboagoa da. Pintura-, kolore- eta ehundura-geruza lauak erabili zituen trinkotasuna eta sakonera aditzera emateko, eta eguneroko eszenak amets antzeko konposizio misteriotsu bihurtu zituen. Bere oihanen pintura ospetsuak are harrigarriagoak dira aintzat hartzen badugu Rousseauk ez zuela inoiz oihanik ezagutu. Aparteko irudimena zuen eta kolorea barra-barra erabiltzen zuen; horretarako Parisko zoo eta parke botanikoetako hostaila eta animaliak izaten zituzten inspirazio-iturri. Horrez gain, liburu batek eragin zion batez ere: Bêtes Sauvages (Piztia basatiak), hesi-artean gordetako 200dik gora basa-animaliaren argazkiak zituen liburuak.
Henri Rousseauk ez zien bere garaiko arau akademikoei jarraitu eta, bizi zen artean, jende ugarik arbuiatu zuen xaloa edo naifa zelakoan. Hala ere, azkenean, Parisko arte-aretoen ezagutza lortu zuen, baita artista gazte eta idazleen miresmena ere, tartean: Guillaume Apollinaire-rena, Pablo Picasso-ren, Robert Delaunay-rena eta Vassily Kandinsky-rena. ‘Primitibista’ modernotzat hartu eta goretsi zuten bere ikuspegi berezi-berezia, forma soilen erabilera, irudi estilizatuak eta egunerokotasunean poesia aurkitzeko gaitasuna zela eta. Geroztik, egungo artista-belaunaldi eta arte-maitaleei ere eragin die.
Entzuteko gida honen bidez, Henri Rousseauren hainbat pintura azalduko dizkizugu, bere ibilbidearen etapen adibide diren pinturak. Horrez gain, horien inguruan artistak zein garaikideek zer esan zuten ere entzuneko aukera izango duzu.