Henri Rousseau

Iruzkinak

X jaunaren erretratua (Pierre Loti) [Portrait de Monsieur X (Pierre Loti)], ca. 1910

Erretratu honek exotismo-aire txundigarria dauka. Ez dakigu seguru Ekialdeko estiloan jantzitako gizona Pierre Loti bidaiari, idazle eta Ipar Afrikari zein Asiari buruzko aditua ote den. Modeloa eta bere tigre-marradun katua, ikusleari zuzenean begiratzen diona, natura hil bateko objektuak balira bezala daude jarriak. Rousseau-k hainbat ikuspegi eskaintzen dizkigu, betiere plano bakarrean. Gizonaren belarria lau-laua da eta aurpegia hainbat geruzaz osatu zuen; horrek ia efektu kubista ematen dio. Rousseauren miresle handi Fernand Léger artista kubistak adierazi zuenez:

“Rousseauk ondo zekien noiz hasi eta noiz bukatu. Hasieratik bazekien zer dimentsio emango zion, goitik behera. Zer bide hartuko zuen ondo baino hobeto zekien. Lehendabizi marrazkia, zehaztasunez mugatua. Gero marrazki hori betetzen zuen, mugak inola ere gainditu gabe”.

Henri Rousseau adimentsua izan da konposizio trinkoko margolan hau osatzean. Aurrealdean, zorrozki adierazitako formak eta kolore ausartak erabiltzen ditu: gorria, zuria, okrea eta beltza. Horrek talka egiten du atzealdean datzan industria-paisaiarekin. Gizonaren eskua eta atzamarrak bere besora collage moduan itsatsi dituela ematen du eta atzeko tximinien oso antzekoak dira. Eskuan duen zigarroari kerik ez dariola dirudi; aldiz, horrekin bat datorren atzealdeko tximini bat ketan dago.

Rousseauk sortu zuen pintura-estiloa ez zuen beste inork hartu, hasierako artista kubistek hala egin zuten arte, esaterako, Pablo Picasso-k, Georges Braque-k eta Fernand Légerrek.