Alberto Durero: Städel Museum-en Bildumako grabatuak
Nemesis (Fortuna handia)
Apokalipsia seriea
Iruzkinak
Gizonen bainua
- Izenburua:
- Gizonen bainua
- Erakusketa:
- Alberto Durero: Städel Museum-en Bildumako grabatuak
- Gaiak:
- Generoa eta sexualitatea | Giza gorputza | Artea eta emozioa | Eragin artistikoa | Sorkuntza artistikoa | Konposizioa | Sinbologia | Biluzia | Eszena-generoa | Italia
- Mugimendu artistikoak:
- Errenazimentua
- Artelan motak:
- Grabatua
- Aipatutako artistak:
- Durero, Alberto
Bizitasun handiko eszena hau 1490. hamarkada amaierako harialderako grabatua da, eta bertan, garai hartan jendea elkartu ohi zen leku baten ikuspegia eskaintzen digu Durero-k: gizonezkoen bainuetxe batena, alegia. Ia biluzik dauden sei gizon patxadan ageri dira, atzealdeko hesitik norbait, jantzita, begira ari zaien bitartean —geure isla izan litekeena—. Gai hau Behe Erdi Aroko ilustrazio ugaritan ere agertu ohi da. Kasu honetan, gizonezko biluziaren xehetasunezko estudioak egiteko aukera eman zion Durerori. Gorputzak hainbat posturatan eta ikuspuntu desberdinetatik irudikatzen ditu. Eskuinaldean edaten ikusten dugun gizon potoloa izan ezik, litekeena da bainularien irudi hau Durerok bere gorputzaren behaketan oinarrituta sortu izana. Gizonen giharrak eta larruazala nabarmen modelatuak daude, eta inguruak ondo zehaztuta. Biluziaren tratamendu hau Europa hegoaldera egin zuen bidaian, italiar arteak eta teoriek Durerorengan izan zuten eraginaren erakusgarri argia da.
Hau bezalako aire zabaleko bainuetxeak XV. mendearen bukaerakoak dira. Normalean hirien inguruetan zeuden kokatuak, iturburu naturaletatik gertu eta hemen ezkerraldean ikusten ditugun eraikinetatik aldenduak. Lagunarteko giro lasaia eta lizun xamarra sumatzen da; izan ere, lehen planoan elkarrizketarako posturan dauden irudien atzean ez dira musika eta edaria falta. Bainuetxean halako erotikotasuna ere igartzen da, artistak iturria non kokatu duen ikusita. Eszena erabat informala bada ere, Durerok irudikatutako Gizonen bainua arreta handiz eraikitako konposizioa da. Ikusiko duzunez, erdiko irudiek piramide antzeko bat eratzen dute, adibidez, eta forma hori bera atzealdeko muinoan errepikatzen da.
Interpretazio ugari egin izan dira Dureroren Gizonen bainua grabatu honetatik. Bertan agertzen diren gizonak zentzumenen irudi direla esan izan da, hau da, ikusmena, entzumena, dastamena, ukimena eta usaimenaren irudi. Interpretazio konplexuago baten arabera, lau umoreen teoria aditzera eman dezakete gizonek, alegia, patxada, suminkortasuna, baikortasuna eta melankolia. Aurrerago, Malenkonia I grabatua komentatzen dugunean, entzun ahal izango duzu xehetasun gehiago Dureroren obran ideia horiek duten garrantziari buruz.