Richard Artschwager

Iruzkinak

Heldulekua I (Handle), 1962

Bere ibilbidearen lehen etapetan, artista moduan ernaltzen ari zenean, Richard Artschwager-ek altzariak egitea zuen bizibide. Erakutsi zuen lehen artelanetako bat hauxe izan zen, Heldulekua I, 1962koa. Pieza honek arotz izatetik, hau da, objektu erabilgarrien fabrikatzaile izatetik artista-lana egitera iragan zen unea markatzen du; bigarren etapa horretan eskulangile moduan zeuzkan ezagutzak baliatu zituen erabilgarritasunik batere gabeko objektu kontzeptualak sortzeko.

Heldulekua I deritzon lan hau hortik aurrera egin zuen ia guztiarentzako “gida” bat izan zela esan zuen Artschwagerrek berak. Lan honetan agerian daude bere ibilbide osoan zehar artista bultzatu zuten interesetako asko. Lehenik eta behin, ez da erabilgarria: ez du balio ezeri eutsi edo tira egiteko. Etxe-barneetan erabili ohi den material batez egina dago, kasu honetan eskaileretarako haritz-zurezko baranda prefabrikatuz; baina ez du balio ez igotzeko eta ez jaisteko. Horrez gain, baranda marko forman muntatuta dago, baina barruan ez dago inongo margolanik. Markoek atentziorik ez zutela eman behar uste zen garai batekoa da markoa. Bestalde, paretan kokatuta dagoenez, margolan bat edo eskultura bat dakar gogora.

Artschwagerrek berak, hain zuzen ere, “ikuslea hura hartzera bultzatzen” duen “margolan bat” zela esanez definitu zuen obra hau. Horrez gain, obra modu egokian balioesteko jarraibideak eman zituen artistak, ingelesezko grasp hitzaren esanahi bikoitza baliatuz: “Obraren ezkerreko eta eskuineko aldeek —idatzi zuen— pieza atzematea ahalbidetzen dute [grasp, fisikoki oratzearen zentzuan, baina baita adimenaren bidez atzematearen edo ulertzearen zentzuan ere]”. Horrela, obra ikusteko distantzia eta kokapen egokia adierazi zuen.