Richard Artschwager

Iruzkinak

Erretratua I (Portrait I), 1962

Erretratua I artelanean, Artschwager-ek pintura eta eskultura konbinatzen ditu, zentzurik literalenean. Bietako zer da? Obrak mihiztaketaren praktika ekar lezake gogora, historikoki surrealistek hasitakoa. Aurkitutako objektu bat du oinarri —bere aroztegian aurkitua akaso—, logelako komoda bat, hain zuzen. Haren gainean erretratu inklinatu bat bermatzen da, ispilu baten edo familiako argazki baten lekua har lezakeena.

Nor irudikatzen du erretratu fantasmagoriko honek? Artista bera? Egia da Artschwagerren begitartearen ezaugarri batzuk igartzen zaizkiola, baina, artistak berak esandakoaren arabera, 1981ean egin zuen lehen autorretratua, eta obra hau 1962koa da. Irudikatzen duena gorabehera, litekeena da argazki batean oinarrituta egotea. Itxura aztoragarria du Celotex gainean margotuta dagoelako, isolamendurako erabiltzen den zuntzezko panel baten gainean, alegia. Material hori mihise moduan erabili zuen Artschwagerrek bere ibilbide osoan zehar. Ikus daitekeenez, azalera irregularra du, eta dauzkan pitzaduretan pintura metatzen da; horrela, urruntzen garenean baino batzen ez diren zati abstraktuetan banatzen da irudia. Erretratatutako pertsonaren aurpegian emozio desatsegin edo deserosoak hautematen baldin badira, litekeena da oinarri irregularrak sortutako efektuen ondorioz izatea.

Komodari dagokionez, gurpil batzuk dauzka, beharbada hasieratik bereak zituenak, edo artistak geroago gehituak akaso. Grisaila-pinturaz edo kolore grisez margotuta dago zura, zuri-beltzeko argazki batek izango lukeen kolore-sorta berean. Zuraren pikorra esajeratuta dago, eta horrenbestez, eratzen diren marrazkiek abstrakzio piktorikoak iradokitzen dituzte. Komoda estaltzen duen pintura azpiko zuraren testuren arabera zehaztuta dago, goiko parteko koadroan gertatzen den bezala. Horrela, artelan enigmatiko honetan hala zura nola argazkia abstrakzio bihurtu dira.