Richard Artschwager

Iruzkinak

Titulurik gabea (Hustua II) [Untitled (DugoutII)], 1967

Altzariak irudikatzen zituzten eskulturak ez ezik, Artschwager-ek ezer konkreturik irudikatzen ez zuten obra abstraktuak ere egiten zituen, kasu batzuetan zoru gainean bermatzen zirenak eta beste batzuetan friso moduan paretatik zintzilikatzen zirenak. Eskultura horiek ere zurezkoak izaten ziren, eta artistak formikaz estaltzen zituen, marmol itxurako zain prefabrikatuekin. Obra horietako askok ez dute titulurik. Paretako erliebe bolumen handikoetan, zehazki, espazio positiboa eta negatiboa markatzen duten pitzadurak agertzen dira. Pieza honen parentesi arteko azpi-tituluak, Hustua II deritzonak, erdiguneko sakonuneari egiten dio erreferentzia asmamen handiz, benetan ez baitago hustua.

Frisoa izaki, obra honek bi eta hiru dimentsioen arteko harremanetan sakontzen du. Haren formikazko estalkiak marmolezko eskultura bat ekar dezake burura, eta are hodei barrokoak ere, baina amets-irudi posible oro bat-batean etenda geratzen da jabetzen garenean forma horiek panelak batzen diren lekuan amaitzen direla. Horrela, Artschwagerrek pinturaren eta eskulturaren arteko muga lausotzen du berriro, eta bere altzarien oinarrizko materiala abstrakziorako eredu moduan darabil.

Garai hartan, hainbat eskultore garrantzitsuk —minimalistek batez ere— fabrikatzaile industrialei eskatzen zieten beren diseinuak gauzatzeko; Artschwagerrek, ordea, bakarka egiten zituen pieza guztiak. Hala ere, bere arotz-trebetasun zorrotzari esker sortutako efektu ironiko batez, giza eskuek ukitu gabekoak izateko itxura dute haren piezek.