Artea eta espazioa
James Rosenquist: Flamenko kapsula (1970)
Ernesto Neto: Burbuila zuria (2013/17)
Iruzkinak
Richard Long: Bilboko zirkulua (2000)
- Izenburua:
- Richard Long: Bilboko zirkulua (2000)
- Erakusketa:
- Artea eta espazioa
- Gaiak:
- Artea eta espazioa | Sorkuntza artistikoa | Forma | Materiala | Ingurunea eta natura
- Mugimendu artistikoak:
- Land Art
- Artelan motak:
- Eskultura
- Aipatutako artistak:
- Long, Richard
Land Art deitutako mugimenduaren aurrendaria izan zen Richard Long, eta bere lanean darabiltzan prozesuek paisaian esku hartzera eramaten dute: haren osagaiak birkonbinatu edo haren aztarnak antolatzen ditu, inguru natural bateko konposizio gisa.
Ildo horretatik, bidea literalki urratu zuen artista da Long. Hirurogeiko hamarkadan hasi zen artegintzan, zelai baten gainean oinez egindako ibilbide zuzen batekin. Ibilian egindako lerroa deitutako lan hartan, haren urratsek lerro markatua, belarrik gabea, utzi zuten lurrean, eta hura hartu zuen argazkian Longek. Hasierako ekintza haren ondoren etorri zen jardueran, mundu guztiko paisaiak ikertu ditu eta bertan esku hartu izan du: eremuak eraldatu ditu, materialak naturan bertan lekualdatu, edo bertatik erauzi ditu, erakusketa aretora eramateko gero. Haren lanetako batzuen oinarria, hain zuzen ere, horixe da, alegia, museora ekartzea bere ibilaldietan bildutako gauzak: harriak, ziriak eta adarrak, hostoak edo lokatza, besteak beste.
Hau da Bilboko Zirkulua lanaren kasua, artistak Guggenheim Bilbao Museorako berariaz sortu zuena. Hau egiteko, Ingalaterrako Kornualles konderriko Delabole udalerrian dagoen harrobiko arbel-puskak erabili zituen. Herrialde hartan jardunean diharduen arbel harrobirik zaharrena da hura.
Lan honetan bat egiten dute zirkuluaren forma puruak eta arbel pusken irregulartasunak; era berean, artistak naturatik hurbilena duen forman aurkezten du materiala, gizakiok historian zehar lurraren baliabideak erauzi eta ustiatzeko izan dugun joerari egindako erreferentziarekin batera.