Eskuak adierazpide: Buhl Bildumako argazkiak
Sarrera
Alexander Rodchenko, Ama (1924)
Iruzkinak
Alfred Stieglitz, Eskuak titarearekin (1920)
- Izenburua:
- Alfred Stieglitz, Eskuak titarearekin (1920)
- Erakusketa:
- Eskuak adierazpide: Buhl Bildumako argazkiak
- Gaiak:
- Eskuak | Bildumagintza | Edertasuna | New York | Georgia O'Keeffe | Henry M. Buhl | Erotismoa
- Mugimendu artistikoak:
- Abangoardia
- Artelan motak:
- Argazkia
- Aipatutako artistak:
- Stieglitz, Alfred
Argazki ezagun honek modu ezin hobean gorpuzten du erakusketa honen gaia, eta Buhl Bildumaren ikur bihurtu da. Alfred Stieglitz-en argazki honek Georgia O’Keeffe talentuzko artista gaztearen eskuak erakusten dizkigu. Stieglitz oso pertsona esanguratsua izan zen New Yorkeko abangoardiaren hastapenetan. Henry M. Buhlek 1993an erosi zion argazki hau O’Keefferen idazkaria izandako lagun bati. Argazki horrek zirrara handia sortu zion, ezen bere argazki-bilduma paregabea giza eskuen inguruko irudiekin osatzea erabaki baitzuen.
Eskuak titarearekin Stieglitzek 1917an hasi zuen irudi seriearen argazkirik ikusgarrienetakoa da. Irudi serie hori O’Keefferen omenezko erretratu-muntaia zen. Hainbat lotura konplexu eta paradoxiko ekartzen dizkigu gogora. Irudiaren indarrik handiena erotikotasunaren eta kastutasunaren artean sortzen den jokoan datza. Eskuek izan ohi duten etxetiar kutsuaz bestera, irudi honetan konnotazio lizunak iradokitzen dituzte. Hain zuzen, goratuta dagoen hatz luzea gorantz zuzentzen da, eskuineko eskuko erpuruak eta hatz erakusleak eratzen duten zirkulu beltzerantz. Artistaren eskuak gogotsu ari dira lanean, baina ehun leunaren kontra sortzen dituzten arabesko dotoreek konposizio apaingarria sortzen dute. Horrela, artista modeloa ere badela adierazteaz gain, Stieglitzen begiradaren nahiz mirespen estetikoaren objektua direla ere nabarmentzen da. Argazkigintzaren zientifikotasun zintzoak erakarri zituen erakusketa honetako beste argazkilari batzuk. Stieglitzek, aldiz, argazkiek ederrak izan behar zutela uste zuen.