Eskuak adierazpide: Buhl Bildumako argazkiak
Barbara Kruger, Titulurik gabea (1985)
Andreas Gursky, Maiatzaren lehena, II (1998)
Iruzkinak
Gabriel Orozco, Nire eskuak nire bihotza dira (1991)
- Izenburua:
- Gabriel Orozco, Nire eskuak nire bihotza dira (1991)
- Erakusketa:
- Eskuak adierazpide: Buhl Bildumako argazkiak
- Gaiak:
- Giza gorputza | Eskuak | Artea eta emozioa | Eragin artistikoa | Sorkuntza artistikoa | Materiala | Sinbologia
- Mugimendu artistikoak:
- Arte Kontzeptuala | Minimalismoa
- Artelan motak:
- Argazkia
- Aipatutako artistak:
- Orozco, Gabriel
Mexikon jaioa, Gabriel Orozco da artista latinamerikar garaikiderik nabarmenenetariko bat. Adierazpide anitz erabiliz egiten du lan: marrazketa, eskultura, argazkilaritza, bideoa eta antzezpena baliatzen ditu bere langintzan, neurri handi batean oinarritzat arte kontzeptuala eta minimalismoa hartuta.
Bi cibachrome irudi hauek artistaren soinaren goialdea erakusten dute. Egilearen eskuak bere bularraren aurrealdean elkartzen dira, benerazio jarreran; eta ireki egiten dira, bere hatzen marka duen buztinezko bihotz-itxurako pieza bat erakusteko. Artistaren eskuekin eskultura modelatzeko jardunbide tradizionala eta betierekoa du aipagai artelan horrek; hau da, ukimen eta esku bidezko artisautza. Badago tradizio latinoen edo ikonografia katolikoaren zehar-aipamenik. Lanak, hala ere, artistaren “materiala” zer den azaltzen duten definizio tradizionalak zalantzan jartzen ditu. Orozcok areagotu egiten du tentsio hori, haragia eta materia bata bestearen ondoan ipiniz, eta buztinezko “bihotza” eta artistaren gorputzaren barruan taupadaka ari den benetako bihotza bata bestearengana hurbilduz. Sinbolismo ahaltsua da, baina iheskorra eta iragankorra du sorburu. Buztinezko bihotza eskuen mugimendu bakarraz sortu da.
Orozcok askotan lan egin du material malguarekin, bere gorputzaren edo inguruaren markarekin inprimatuta: pieza hau egin eta urtebetera, adibidez, pastazko bola handi bat jarri zuen erakusgai. Artistaren gorputzak adina pisatzen zuen gutxi gorabehera, eta kalean behera biraka eramana zuen, errepideko hautsa, hondakinak eta galtzadako mailatuak har zitzan.