Kandinsky

Iruzkinak

Krinolinadun taldea (Reifrockgesellschaft), 1909

Olio-pintura mihise gainean, 95,6 x 150,3 cm
Solomon R. Guggenheim Museum, New York, Solomon R. Guggenheim sortze-bilduma, 45.966

Krinolinadun taldea egin zuenean, Kandinsky uko egiten hasia zen fantasiazko eszenatokiak gogorarazten zituzten lehen garaietako irudiei, sorkuntza abstraktuagoen alde. 1909an Munichen margotutako lan honetan nabarmen ageri da Frantziako arte modernoa gogoko zuela. Izan ere, 1906tik 1907ra bitartean Parisen bizi izan zen. Kandinskyk bereziki miresten zuen errealismotik inpresionismorako trantsizioan oinarrizko figura izandako Edouard Manet pintorearen lana. Eta Krinolinadun taldea laneko eszenak Maneten 1862ko Musika Tuilerietan margolana gogorarazten du, garaiko aisialdi-jarduerak erakusten dituena.

Kandinskyren koadroak Biedermeier modaren arabera jantzitako gizon-emakumeen aire zabaleko bilera sozial bat irudikatzen du, XIX. mendearen erdialdeko estiloan, ezaugarri dituena gerri oso markatuko eta bolumen handiko soinekoak. Europako artista askok erabili zuten hain teatrala zen janzkera hura euren lanetan mende-aldaketaren garaian. Kandinskyk ere zirriborro, marrazki eta margolan ugari egin zituen gona krinolinadunak, abanikoak eta orrazkera itzelak zeramatzaten emakumeekin, lorategietan edo arkitektura neoklasikoko atzealde baten aurrean posatzen zeudela.

Krinolinadun taldea lanaren gaia XIX. mendeko eszena inpresionistei zor zaie, baina koadroaren kolore-eskema distiratsua eta erradikala XX. mendearen hasieran Henri Matissek eta Andre Derainek gidatu zuten fauves edo “piztien” mugimendu abangoardistan inspiratuta dago argi eta garbi. Fauvisten lanek pintzelkada nabarmentzen zuten, eta nahiago zituzten kolore indartsu eta ausartak eduki figuratibo edo errealistak baino.

Parisen bizi izan zen lehen urteetan, Kandinskyk erakusketa egin zuen 1906ko Udazkeneko Aretoan; Matisse eta fauveak nabarmendu ziren han. Artistak Matisse miresten zuen; izan ere, bere testuetako batean “Frantziako margolari moderno handienetako bat” bezala definitu zuen. 1911n, Kandinskyk areto honetan ikusgai dagoen Pastorala izeneko koadroa margotu zuen, eta, horretarako, Krinolinadun taldea laneko janzkera formalak berreskuratu zituen, eta eszena abstrakzioak eta estilizazioak markatutako paisaia utopiko batean birformulatu zuen.