Kandinsky
Marraduna (Rayé), 1934ko azaroa
Zigzag zuria (Le zigzag blanc), 1938ko maiatza
Iruzkinak
Irudi apetatsuak (Formes capricieuses), 1937ko uztaila
- Izenburua:
- Irudi apetatsuak (Formes capricieuses), 1937ko uztaila
- Erakusketa:
- Kandinsky
- Gaiak:
- Artea eta politika | Artea eta emozioa | Artea eta zientzia | Eragin artistikoa | Ibilbide artistikoa | Sorkuntza artistikoa | Biomorfoa | Geometria | Kolorea | Mugimendua | Bauhaus Eskola | Bigarren Mundu Gerra | Neuilly-sur-Seine | Paris | Itxaropena
- Mugimendu artistikoak:
- Arte Abstraktua | Arte Garaikidea
- Artelan motak:
- Pintura (olio-pintura)
- Aipatutako artistak:
- Kandinsky, Vasily
Olio-pintura mihise gainean, 88,9 x 114,8 cm
Solomon R. Guggenheim Museum, New York, Solomon R. Guggenheim sortze-bilduma, 45.977
1933tik 1944ra bitartean Neuilly-sur-Seinen bizi izan zen Kandisky, Paris kanpoaldean. Gerrak berriro urratutako Europa baten panorama goibela izan arren, garai horretako konposizioek itxura ludikoa eta kolore argiagoak dituzte ezaugarri.
Kandinskyk Forma apetatsuak izena jarri zion koadro honi. Egia esan, forma biomorfiko bitxi horiek bizitza propioa dutela dirudi. Kandinskyk beti uste izan zuen forma zehatzetan bulkadak, tentsioak eta bizi-energia pilpiran zebiltzala, fisikoki ia, eta oihartzun nabaria zutela horietan. Biologiari eta zoologiari buruzko liburuen bilduma egiten zuen, eta interes berezia zeukan zelula-egituren argazki mikroskopikoetan. Parisen, pixkanaka enbrioien eta zelulen ikonografia gero eta gehiago txertatzen joan zen artelanetan, baita amebak gogorarazten zituzten motiboak ere.
Lan honetan, Kandinskyk flotatzen dabiltzan pastel koloreko irudi lerromakurrez osatutako dantzarekin bete zuen mihisea. Forma horietako batzuk enbrioien irudikapen estilizatuak edo zientzia gaietako beste ilustrazio batzuk dirudite. Forma organiko horien artean, Bauhauseko lanak gogorarazten dituzten profil garbiko zirkulu eta karratuak tartekatu zituen.
Koadroak hazkunde- eta ahalmen-sentsazio argia transmititzen du; itxura batean, forma organikoek elkar bultzatzen dutela dirudi, espazioak inbadituz edo zelulen antzeko irudi ilunago eta zirkularragoak inguratuz. Daukan bizi-indarrari esker, oztoporik gabe hedatzen den natura emankorraren hazkunde “apetatsua” da. Garai historiko ilunaren erdian, biologiatik hartutako motiboak erabiltzea Kandinsky berpizkunde- eta birsorkuntza-etorkizun bat aurreikustera zeraman adierazpen baikorra izan zitekeen beharbada.