Gego. Infinitua neurtzen

Iruzkinak

Paperik gabeko marrazkia 76/4 (Dibujo sin papel 76/4), 1976

1976 eta 1988 artean, Gegok Paperik gabeko marrazkiak izeneko obra-sail bat egin zuen. Pieza horiek espazioan marraztearen ekintza gogorarazten dute: artistak egitura linealeko lerroak eta konstelazioak ehundu zituen azalera handi batean. Horixe da, alde handiz, Gegoren sailik luzeenetako bat, eta funtsezko inflexio-puntua adierazten du haren bilakaera artistikoan.

Metalezko hariz eta burdineria-pieza txikiz egindako obra horiek hormatik zintzilik daude zuzenean, airean marraztuta baleude bezala. Sail horretako pieza guztiak desberdinak dira, eta horrek agerian uzten du Gegok forma eta egitura esperimentatzeko eta esploratzeko zuen grina, bai eta espazioa modulatzekoa ere. Obra bakoitza bakarra da, eta argi erakusten du artistak zuen ikuspegi metodiko eta sistematikoa. Tituluek sorrera-urtea eta pieza bakoitzari dagokion hurrenkera-zenbakia adierazten dituzte, eta, beraz, sail mardul honetan ageri diren tipologiak kategorizatzeko mekanismo gisa ere balio dute.

Eskultura hau 1976an egina da, eta saileko laugarrena da. Konposizioa alde batetik bestera zeharkatzen duten plastikozko hodi koloretsuek apurtu egiten dute goitik behera datozen haga luzangen bertikaltasuna. Pieza ikuslearen espazioan sartzen da pixka bat, eta itzal diskretu bat eragiten du atzealdean; halaber, mihiztadura kaotiko eta dotorez konbinatzen ditu forma minimalistak.