Gego. Infinitua neurtzen

Iruzkinak

Esfera (Sphere), 1959

1959 eta 1960 artean, Gego eta bere bikotekide Gerd Leufert Amerikako Estatu Batuetan izan ziren denboraldi batez. Iowan zirela, Esfera izeneko lan hau sortu zuen artistak. 1960an, New Yorkeko Museum of Modern Art-ek erosi zuen, eta museo hura Gegoren lana bere bilduman sartu eta ikusgai ipini zuen lehen erakundeetako bat izan zen Amerikako Estatu Batuetan.

Letoiz eta altzairu soldaduz egindako hiru dimentsioko lan honetan, elkarrekin gurutzatzen eta gainjartzen diren hodi-lerroz daude osatuta ardatz diagonalen bidez konektatutako plano erdizirkularrak. Eskulturak bizia hartzen du ikusleak haren inguruan mugitu ahala. Izan ere, pertzepzioa desitxuratu egiten da, eta mugimenduaren ilusio optikoa sortzen da: ematen du, euren inguruarekin alderatuta, objektuak mugitu egiten direla —“paralaxi-efektu” ere deitzen zaio fenomeno horri—. Garai hartan, Gegok arte zinetikoaren printzipioak txertatu zituen Venezuelako artegintzan, eta bere obran sintetizatu zituen argiaren, mugimenduaren eta espazioaren inguruan egin zituen azterketak. Metalezko lehen eskultura haiek sortzeko, soldatzaileen laguntza behar izan zuen. Gerora, aldiz, ikusmoldea aldatu eta eskuekin molda zitzakeen materialak hasi zen erabiltzen.