Calder. Grabitatea eta grazia

Iruzkinak

Bola txikia kontrapisuarekin, 1931 inguru

Pieza goiztiarra dugu hau, eta Bola txikia kontrapisuarekin izena du. 1931n egin zuen Calder-ek, Parisko abangoardiako funtsezko kide askoren aurrean bere ospea finkatzen hasten ari zenean. Parisko artista abstraktuen talde nagusia Abstrakzioa‑Sorkuntza izenekoa zen. Talde horrek erakusketa eta urtekari ugari antolatu zuen, nazioarteko artista abstraktu askoren lanak bultzatzeko. Arteko printzipio garbi eta ez‑objektiboei lotua zegoen. Taldeko kideek eurekin erakusketak egitera gonbidatu zuten Calder. Taldeak oso garrantzi handiko artistak barne hartzen zituen, hala nola Jean Arp, Theo Van Doesburg, Piet Mondrian eta Robert Delaunay. Euren taldean Calder onartzea erabaki izanak garbi erakusten du halako lanak sortzen ari ziren interes handia.

1932an, Calderrek adierazpen bat argitaratu zuen Abstrakzioa‑Sorkuntza taldearen argitalpenean, bere metodoari buruz:

“Nola gauzatzen da artea?

Bolumenetatik, mugimendutik, inguruko espazioaren barruan egindako espazioetatik, unibertsotik aterata. Masa ezberdinetatik, tamaina eta kolore aldaketez lortutako masa trinko, astun, ertainetatik aterata. Norabide lineatik aterata: mugimendua, abiadura, azelerazioa, energia eta abar adierazten dituzten bektoreak; ertz eta norabide adierazgarriak eratzen dituzten lineak, osotasun bat edo gehiago eratuz. Espazioak eta bolumenak, euren masaren kontrako aurkakotasun arinenaz sortuak, edo bektoreek zeharkatuak, momentuak gurutzatuak.

Horietako bat ere ez da finkoa. Elementu bakoitza mugitzeko, higitzeko edo aurrerantz eta atzerantz balantzaka aritzeko gaitasuna du, unibertso honetako beste elementu bakoitzarekiko harreman aldakorrean. Hartara, une bakartuak ez ezik, bizitzako gertaeren arteko aldaketa lege fisiko bat ere erakusten dute. Ez erauzketa, baizik eta abstrakzioak: erreakzionatzeko moduan izan ezik, ezer bizidunen antzekoak ez diren abstrakzioak”.