Cai Guo-Qiang: Sinetsi nahi dut

Iruzkinak

Sarrera

Ongi etorri Cai Guo-Qiang: Sinetsi nahi dut erakusketara, entzute handiko artista garaikideetako bati eskainitako atzera begirako honetara. Hau da Guggenheim Museoak Txinan jaiotako artista bati eskaintzen dion lehen bakarkako erakusketa. Cai Guo-Qiang: Sinetsi nahi dut BBVAren babesari esker gauzatu da.

Cai Guo-Qiang ezaguna da, batik bat, eskala handiko leherketa-proiektuengatik, bolbora-marrazki berritzaileengatik eta kokapen zehatzeko instalazioengatik, izan ere, azken horiei esker izena du nazioartean. 2008an heldu zen benetan nazioarteko ikusleengana, Beijing 2008 Olinpiar Jokoen hasiera- eta amaiera-ekitaldietako su artifizialak ideiatu eta diseinatu baitzituen.

Cai 1957an jaio zen Txinako hego-ekialdeko Quanzhou kostaldeko hirian, Fujian probintzian. 1990eko hamarkadaren hasieran erakarri zuen lehen aldiz nazioarteko arte munduaren arreta, nahiz eta lehendik ere, 1980ko hamarkadan, Shanghaira eszenografia ikastera joan eta Txinako abangoardia-artisten lehen belaunaldiko kide bihurtu. Belaunaldi horretako artistak Txina komunistan hazitakoak ziren, baina mendebaldeko ideia, estilo eta teoria artistikoak ezagutzeko aukera izan zuten herrialdeak erreforma ekonomikoari eta politikoari ekin zionean.

1986an Cai Japoniara joan zen bizitzera. Han zegoela, haren obra bilakatzen joan zen, gainera, ekialdeko eta mendebaldeko arteen arteko ukipenaz elikatzen zen. 1995ean New Yorkera joan zen. Beraz, “munduko hiritarra” da Cai eta horrela azal daiteke haren lanaren funtsetako bat, hots, kultura-mugak ahulak izatea.

Erakusketan, Cai Guo-Qiangek egin duen ibilbidearen alderdi guztiak ikusi ahal izango dituzu, eskala handiko instalazioak eta leherketa-proiektuak, baita bolbora erabiliz egiten dituen marrazki intimoagoak ere. Gainera, New Yorkeko Guggenheim Museoan Asiar Artearen Kontserbazio-Arloko Buru den Alexandra Munroe-ren aipamenak ere entzuteko aukera izango duzu.