Ispilua alderantziz. "La Caixa" Fundazioaren eta MACBAren bildumen artea
Antonio Saura, Irudi biluzi handia (Grand nu), 1960–61
Iruzkinak
Sarrera
- Izenburua:
- Sarrera
- Erakusketa:
- Ispilua alderantziz. "La Caixa" Fundazioaren eta MACBAren bildumen artea
- Gaiak:
- Sorkuntza artistikoa | Dau Al Set | Düsseldorfeko Eskola | Vancouverreko Eskola | Espainia | Europa | Katalunia
- Mugimendu artistikoak:
- Arte Garaikidea | Arte Kontzeptuala
- Aipatutako artistak:
- Ortega, Damián | Polke, Sigmar
Ongi etorri Ispilua alderantziz erakusketara. Honetan batera daude “La Caixa” Fundazioaren eta MACBA Arte Garaikideko Bartzelonako Museoaren bildumak. “La Caixa” aurrezki-kutxa nagusietako bat da Europan, eta gizarte-ekintza sustatzen duen fundazio ongile handienetakoa Espainian. “La Caixa”k arte garaikide bilduma bat hasi zuen 1985ean, eta egun 900 artelanetik gora ditu. MACBA museoa, berriz, nahiko berria da; 1995ean ireki zuten, eta ordutik eragin nabarmena izan du arte garaikidearen eszenan.
Elkarrekin batera izugarri handiak dira bi bilduma horiek: guztira 5.500 artelan. Beraz, arte garaikidearen bilduma zabalenetakoa da Europan. Horretatik 90 bat artelan aukeratu dugu; elkarrekin lehenbiziko aldiz aurkeztu dira dagozkien erakundeen egoitzetatik at.
Bilduma bikain horiek gure garaiko artea zein joria eta konplexua den erakusten digute. Guggenheim Bilbao Museoko Ispilua alderantziz bidaia zoragarri bat da, 1940ko urteetatik gaurdaino eramango gaituena. Erakusketa hau sei ataletan banatu da, gaien arabera.
Hemen ikusiko dituzun lanak 52 artistak sortu dituzte, eta guztiek arte garaikidearen garapenaren alderdi garrantzitsuren bat jorratu dute. Era berean, ikusizko arteetan aldaketak ekarri dituzten joerak eta mugimenduak aditzera emateko asmoz aukeratu dira lanak. Hala, besteren artean, Espainiako eskola apurtzaileak, esaterako, Dau Al Set talde katalana, izaera independente nabarmena zuena, eta urruneko Vancouverreko eta Düsseldorfeko eskolak bildu nahi izan ditugu.
Erakusketa honek oso desberdinak diren artistak hartu ditu barnean, besteak beste, Sigmar Polke pintore alemana eta Damián Ortega kontzeptualista mexikar ironikoa. Apurtutako ispilu baten modukoa da erakusketa, horrexegatik Ispilua alderantziz izenburua: elkarrekin aurkeztutako bilduma bien elkartze guneak (antzekotasunak), eta islatze-guneak (aldeak) agerian jartzen dira. Horixe da aztertu duguna. Ziur gaude erakusketaz gozatuko duzula, ispiluari zuk zeuk begiratuz.